Telgħu il-poloz għat-Tazza Sette Giugno li se tkun qed tiġi organizzata b’kollaborazzjoni mal-kumpanija ALDB & Associates Ltd. Il-poloz telgħu waqt konferenza tal-aħbarijiet it-Tlieta wara nofsinhar fil-Malta Equidrome.
Din se tkun it-13-il edizzjoni tat-Tazza Sette Giugno u għal darb’oħra se jkun qed jiżdied il-premju lir-rebbieħa tant li din is-sena se jkun qed jingħata premju għall-ħames post. Apparti mis-sitt elef ewro li se jitqassmu fi premjijiet, l-ewwel ħamsa se jieħdu trofew u ż-żiemel rebbieħ għandu għata kommemorattiva filwaqt li ismu jitnaqqax fuq it-trofew tas-Sette Giugno li kienet ġiet inawgurata fl-2011. Kull finalist se jkollu wkoll numri personalizzati li jinżammu bħala tifkira tal-parteċipazzjoni tagħhom fil-finali.
Il-finali tal-ALDB Sette Giugno Cup se ssir nhar il-Ġimgħa 7 ta’ Ġunju filgħaxija u fiha s ejieħdu sehem tnax-il finalist. Fost dawn hemm ir-rebbieħ tas-sena l-oħra Akela Play li spiċċa wkoll fir-4 post fit-Tazza l-Kbira ta’ din is-sena u huwa rebbieħ ta’ diversi unuri. Miegħu Charming Soldier li spiċċa t-tielet fil-finali tas-sena l-oħra u wkoll rebbieħ ta’ diversi unuri fosthom it-Tazza l-Kbira fl-2022. Insibu wkoll lil Velvet Gio u Mac Smily li kienu wkoll fil-finali tal-edizzjoni ta’ din is-sena tat-Tazza l-Kbira u spiċċaw fit-2 u l-5 post rispettivament.
