Dati importanti din is-sena se jkunu t-2, it-3 u s-6 ta’ Ġunju.
Jekk kien hemm min ħaseb li l-1 ta’ Mejju kien il-qofol tal-attivitajiet li l-Partit Laburista ħejja għal din is-sena arralu xi ftit. Dan għax l-ewwel ġimgħa ta’ Ġunju se tkun waħda bieżla mhux ħażin għall-ikbar partit politiku f’Malta. Sena wara r-rebħa elettorali ta’ Ġunju 2017 u 10 snin wara li Joseph Muscat inħatar Mexxej tal-Partit Laburista hemm programm ta’ attivitajiet varjat u interessanti mħejji, bit-2, it-3 ta’ Ġunju u s-6 ta’ Ġunju huma jiem li wieħed għandu jżomm vojta biex jieħu sehem fl-attivitajiet li se jkunu qegħdin isiru.
Il-Kap Eżekuttiv tal-Partit Laburista, Randolph De Battista, tenna li mhux biss se nkunu sena wara elezzjoni, iżda se nkunu wkoll sena qabel elezzjoni oħra u l-Partit Laburista jrid jibda jaħseb biex jiffinanzja kampanja elettorali tajba bħalma kellu fl-aħħar snin.
“Jekk irridu nżommu l-livelli tal-aħħar snin irridu nibdew naħsbu kmieni għall-finanzjament għax aħna niddependu mill-għotjiet li jagħtuna l-ħafna. Biex ittella’ avvenimenti bħalma tellajna fl-aħħar ġimgħa ta’ April u l-ewwel ta’ Mejju hemm bżonn investiment kbir u ma’ dak li nagħmlu minn ġimgħa għal ġimgħa u minn xahar għal xahar irridu nibdew inħarsu lejn Mejju 2019. Għandna l-obbligu li jkollna l-aqwa kampanja biex in-nies tifhem għaliex għandha tafda lill-Partit Laburista fil-Parlament Ewropew. Dan għall-ġid ta’ pajjiżna,” qal De Battista. Fisser li fit-3 ta’ Ġunju se jsir ġbir ta’ fondi mis-sagħtejn ’il quddiem u kulħadd se jkun imħeġġeġ iżur iċ-Ċentru Nazzjonali Laburista. “Is-sajf se jkun wara l-bieb u allura ejja nagħlqu bil-kbir billi nieħdu sehem f’dak li se jkun hemm. Se jkun ukoll ġbir ta’ fondi b’differenza b’sehem iktar interattiv u divertenti mill-politiku. Se naħsbu wkoll biex għall-ewwel darba l-pubbliku jkun iktar involut,” qal De Battista li spjega kif ġurnata qabel ukoll hemm stedina biex in-nies jattendu ċ-Ċentru Nazzjonali Laburista. “Hija xi ħaġa li se nagħtu iktar dettalji dwarha fil-jiem li ġejjin. Però nista’ ngħid li l-Partit għandu bżonn iġedded it-tim ta’ volontiera tiegħu. U min hu interessat se jkun mistieden jiġi jinkiteb fit-2 ta’ Ġunju,” żied il-Kap Eżekuttiv tal-Partit Laburista.
Erbat ijiem wara mbagħad il-poplu Malti hu msejjaħ Raħal Ġdid biex jiċċelebra l-għażla biex fil-Partit Laburista u f’pajjiżna nħolqot Ġenerazzjoni Rebbieħa. “Se jkollna festa ta’ suċċess. Is-suċċess tal-Partit Laburista, iżda iktar minn hekk is-suċċess ta’ pajjiżna. Fuq kollox dan is-suċċess huwa biss ispirazzjoni biex nibnu ’l Malta ta’ Għada fejn irridu nibqgħu nuru li l-Partit Laburista huwa l-moviment politiku f’pajjiżna li jista’ jwassal għall-pass li jmiss,” temm De Battista.
