Fl-ewwel tliet xhur ta’ din is-sena, in-nefqa soċjali tal-Gvern żdiedet bi €13.2 miljun.
Statistika maħruġa mill-uffiċċju nazzjonali tal-istatistika, l-NSO wriet li n-nefqa soċjali bejn Jannar u Marzu li għadda ammontat għal €243 miljun.
Dan ifisser żieda ta’ 5.8% fuq l-istess perjodu tas-sena l-oħra.
Kemm in-nefqa fuq il-benefiċċji kontributorji bħall-pensjonijiet u dawk mhux kontributorji bħall-għotja għall-persuni b’diżabilità rrappurtaw żidiet.
Iż-żieda fin-nefqa fuq il-benefiċċji kontributorji kienet l-akbar waħda hekk kif ammontat għal €12.2 miljun jew kważi tnejn u disgħin fil-mija (91.9%) taż-żieda fin-nefqa soċjali.
In-nefqa fuq il-benefiċċji kontributorji ammontat għal €194.3 miljun li jfisser 6.7% aktar mill-ewwel tliet xhur tas-sena l-oħra.
F’kuntest li Gvern Laburista ta ħames żidiet lil pensjonanti, bejn Jannar u Marzu li għadda, in-nefqa fil-pensjonijiet żdiedet b’€9.2 miljun.
Kien hemm żidiet ukoll fil-bonus kontributorju u l-pensjoni tar-romol li n-nefqa fuqhom żdiedet b’miljun u sitt mitt elf ewro kull benefiċċju.
F’din il-kategorija tal-benefiċċji kontributorji naqset bi tliet mitt elf ewro n-nefqa fuq il-pensjoni tal-invalidità.
Fl-ewwel kwart ta’ din is-sena żdiedet ukoll in-nefqa fl-għotja għall-persuni b’diżabilità u l-benefiċċju li jinqata’ gradwalment meta persuna tidħol fid-dinja tax-xogħol.
In-nefqa għalihom żdiedet b’€0.8 miljun u b’€0.3 miljun rispettivament.
In-nefqa fuq il-benefiċċji mhux kontributorji laħqet l-€48.7 miljun li jfisser 2.3% aktar mill-ewwel tliet xhur tas-sena l-oħra.
L-istatistika tal-NSO turi li bejn Jannar u Marzu li għadda kien hawn aktar minn ħamsin elf persuna (50,233) li jirċievu l-pensjoni taż-żewġ terzi mid-dħul li kellhom.
Dan filwaqt li aktar minn tnejn u għoxrin elf persuna (22,558) irċievew iċ-children’s allowance.
Fuq din l-aħħar għotja tal-Gvern lil familji kien hemm 1,246 persuna aktar.
L-NSO rrimarka li din iż-żieda fin-nefqa soċjali m’għandha l-ebda rabta mal-benefiċċji soċjali li żied il-Gvern minħabba l-imxija tal-Coronavirus hekk kif dawn it-tip ta’ benefiċċji bdew jingħataw f’April.
