Rapport ikkummissjonat mil-PwC u Finance Malta wera kif fost l-operaturi tasservizzi Finanzjarji f’pajjiżna kien hemm żieda fl-ottimiżmu meta mqabbel mas-sena 2017.
Rapport fil-gazzetta Kullħadd jispjega aktar minn 62% tal-operaturi f’oqsma bħal dawk tal-banek, kumpaniji tal-assikurazzjoni u management fost oħrajn, jikkummentaw dwar settur li sejjer tajjeb ħafna u futur li wkoll jidher tajjeb ħafna u stabbli.
Il-PwC u Finanza Malta sabu li dawk il-kumpaniji li jispikkaw fl-ottimiżmu tagħhom huma dawk fis-settur tal-assikurazzjoni, mhux biss mil-lat ta’ volum ta’ xogħol li kellhom, iżda anke mil-lat ta’ kemm in-negozju tagħhom misteni li jħalli profitt.
Il-Financial Services Survey, li ħareġ fl-aħħar jiem, huwa r-raba’ stħarriġ tax-xorta tiegħu, u jsir biex jesplora u janalizza l-livell ta’ ottimiżmu, l-attività ekonomika u l-profitti tal-operaturi f’pajjiżna. L-istess operaturi, madwar 34%, li jfisser li l-persentaġġ baqa’ stabbli mas-sena l-oħra, jikkonfermaw li rreġistraw żieda fil-volum tax-xogħol.
Fl-istess stħarriġ, l-operaturi jagħmlu referenza għat-teknoloġija tal-blockchain, u jaraw din it-teknoloġija bħala opportunità, minkejja li l-informazzjoni għal dan l-istħarriġ kienet miġbura qabel mal-liġijiet imressqa quddiem il-Parlament biex jirregolaw dan is-settur, kienu leġiżlati.
Il-liġijiet li għaddew mill-Parlament se jippermettu t-twaqqif ta’ ekosistema b’saħħitha għal dawk il-kumpaniji li joperaw permezz tat-teknoloġiji emerġenti, fosthom il-blockchain. Dan kollu se jkun qed jiftaħ aktar toroq ta’ opportunitajiet bħala pajjiż, mhux biss fuq livell individwali, iżda b’mod ġenerali għall-ekonomija tagħna.
Il-Gvern għandu l-ħsieb li jkompli jesplora u jinċentiva aktar l-innovazzjoni billi fost l-oħrajn iħares lejn teknoloġiji ġodda, fosthom dawk tal-Intelliġenza Artifiċjali, Quantum Technology, Big data u Internet of things. Il-Prim Ministru tkellem f’bosta okkażjonijiet dwar il-ħtieġa li issa bħala pajjiż indawru ħarsitna lejn teknoloġija bħall-intelliġenza artifiċjali, xogħol li diġà beda jsir.
F’dak li għandu x’jaqsam mat-tħassib tal-operaturi, l-aktar li qed tidher bħala sfida għas-settur tas-servizzi finanzjarji hija li jkun hawn biżżejjed ħaddiema. Din hija sfida pożittiva, għax tfisser kemm il-pajjiż qed jirnexxilu joħloq mhux biss impjiegi u opportunitajiet hekk kif qed ikompli jikber.
Mill-istess rapport ta’ PwC u Finance Malta jidher li għad hemm bosta mistoqsijiet mill-kumpaniji dwar it-tħaddim tal-muniti virtwali u l-ismart contracts f’ċerti aspetti minn dawn il-kumpaniji. Wieħed irid iżomm f’moħħu li dawn ir-riżultati huma miksuba fi żmien fejn qed jissoktaw l-attakki l-ewwel u qabel kollox minn esponenti Maltin, fosthom il-Membri Parlamentari Ewropej tal-Partit Nazzjonalista u mezzi tax-xandir internazzjonali li qed jieħu x-xoqqa f’moxtha li jirkbu fuq il-kampanja negattiva xprunata minn nies bħal David Casa u Roberta Metsola. Minkejja kollox huwa ċar, li l-operaturi, bl-istess mod kif qed jimxi l-poplu Malti u Għawdxi mhux qed jagħtu kas ta’ dan, għax jafu li bħala pajjiż ninsabu mexjin ’il quddiem.
F’kummenti mal-gazzetta Kulħadd, is-Segretarju Parlamentari Silvio Schembri stqarr li l-fatt li ż-żieda fl-ottimiżmu fost l-operaturi tas-servizzi finanzjarji ġiet fi żmien meta għaddejjin attakki fuq is-settur, kemm domestikament, iżda anke fuq bażi internazzjonali, juri mhux biss kemm dawn l-attakki huma bbażati fuq fatti skorretti, iżda anke kemm filfatt l-istituzzjonijiet tagħna qed jaħdmu.
Schembri żied jgħid li minkejja li wieħed jistenna li jkun hemm kulħadd fuq l-istess front, mhux b’inqas l-Oppożizzjoni, f’settur fejn m’għandniex indaħħlu l-politika, minkejja l-attakki dan il-Gvern mhux qed jaqta’ qalbu u r-riżultati miksuba jidhru bl-aktar mod ċar. Silvio Schembri tenna li l-impenn tal-Gvern huwa dak li jkompli jagħti l-għodda kollha neċessarja sabiex, dan is-settur tant importanti għall-ekonomija tagħna jkompli jikber anke permezz tal-innovazzjoni.
