Erbgħin żagħżugħ u żagħżugħa mill-Fgura qasmu u ddiskutew l-ideat tagħhom għal spazju miftuħ ta’ 52,000 metru kwadru li l-aġenzija Project Green se tagħmel f’din il-lokalità.
Dan il-proġett hu wieħed mill-erba’ proġetti mħabbra riċentament li se jsiru minn fondi Ewropej.
L-aġenzija Project Green iltaqgħet ma’ dawn iż-żgħażagħ, li jirrappreżentaw għaqdiet differenti minn din il-lokalità, bil-periti ħadmu flimkien magħhom fejn iddiskutew il-karatteristiċi tal-proġett ippjanat u identifikaw proposti ġodda.
Dan il-park il-ġdid fil-Fgura se jinkludi żona ta’ logħob għat-tfal, spazji għall-adoloxxenti bi strutturi moderni ta’ rikreazzjoni u żona ta’ pikniks. Dan il-proġett se jinkorpora prattiki ta’ tisbiħ sostenibbli, bħall-introduzzjoni ta’ pjanti indiġeni, ġonna tax-xita u disinn li jippreserva u jsaħħaħ il-valur ekoloġiku taż-żona.
Dwar l-ispazju miftuħ tkellem il-Kap Eżekuttiv ta’ Project Green, Steve Ellul.
Qal, “Ġewwa l-Fgura bdejna bl-ewwel proċess, propju hawnhekk f’District Park – żona li ħa tkun kbira darbtejn daqs Ta’ Qali. Illum flimkien mal-Iscouts u ma’ numru ta’ entitajiet oħrajn rajna xi jridu ż-żgħażagħ u t-tfal tal-Fgura u ta’ dawn l-inħawi. Biex minn hemmhekk issa nibdew id-disinji għal dan il-proġett importanti li se jagħmel id-differenza fil-Fgura, fil-Kottonera u fiż-żoni urbanizzati fin-naħa t’isfel tal-pajjiż.”
Membri tal-Fgura Scout Group wasslu l-apprezzament tagħhom għal dan l-eżerċizzju ta’ konsultazzjoni fit-tfassil ta’ dan il-proġett.
Qalet, “Inħossuna onorati ħafna għax ġejna involuti biex naħsbu u niddisinjaw dan il-proġett kbir li se jsir fis-south. Għandna bżonnu u huwa utli u huwa spazju miftuħ fejn it-tfal jistgħu jikbru u dan il-proġett ħa jkun għat-tfal ta’ issa u għall-ġenerazzjonijiet li ġejjin.”
Il-Kunsill Lokali tal-Fgura wkoll laqa’ dan l-iżvilupp f’din il-lokalità.
Qal, “Il-Kunsill Lokali jemmen li Project Green għamel pass ’il quddiem fejn tidħol il-lokalità tal-Fgura għaliex nafu kemm ilna għal dawn l-aħħar snin naraw fuq il-midja soċjali li n-nies tal-Fgura huma minsijin fejn jidħlu spazji miftuħa, però dan l-aħħar ftit ġranet rajna l-proċess li beda hawnhekk fejn tidħol din l-art enormi, li tista’ tgħid li hija waħda mill-ikbar artijiet naturali li hawn ġol-pajjiż, fejn se tibda tiġi kkonvertita għal spazju miftuħ, mhux biss għar-residenti, iżda għan-nies tal-madwar.”
