Żewġt irġiel arrestati b’rabta ma’ pick-pocketing f’Tas-Sliema u San Ġiljan

Wara rapporti ta’ pick-pocketing f’diversi postijiet madwar tas-Sliema u San Ġiljan, partikolarment minn fuq it-trasport pubbliku u minn bus stops iffrekwentati minn għadd ta’ turisti u Maltin, il-Pulizija bdiet l-istħarrig tagħha filwaqt li f’dawn l-aħħar jiem l-investigazzjonijiet intensifikaw u diversi persuni ta’ nazzjonalita’ Rumena kienu qed jiġu sorveljati mill-Pulizija.

Kien intervent f’waqtu mill-Pulizija nhar il-Ġimgħa 22 ta’ Settembru, 2017 meta għal ħabta tal–għaxra ta’ filgħodu, żewġ persuni qajmu suspett lill-Pulizija, wara li dehru jindiesu ma’ għadd ta’ turisti u Maltin fuq bus stop ġo Triq it-Torri, tas-Sliema. Wieħed minn dawn il-persuni deher bħala spotter, filwaqt li l-ieħor deher jisraq kartiera minn but ta’ turist li kien tiela` fuq tal-linja. Il-Pulizija ntervjeniet minnufiħ u arrestat liż–żewġ persuni. 

Wieħed mill-irġiel li għandu 35 sena, hu mifhum li huwa reċediv fuq l-istess reat ta’ pick-pocketing ġewwa; Hamburg il-Ġermanja, l-Olanda u fl-Isvizzera għandu mandat t’arrest fuq reati simili. Ir-Rumen l-ieħor, ta’ 41 sena, ukoll hu magħruf mal-Pulizija Ċeka fuq akkużi ta’ dokumenti foloz. Iż–żewġ persuni mistennija jitressqu l-Qorti għada.

Dan kien it-tieni każ t’arrest fi ftit jiem, wara li nhar it-Tlieta 19 ta’ Settembru, ġew arrestati żewġ persuni Rumeni, li qajmu suspett lill-Pulizija u fuq wieħed minnhom instab telefon ċellulari li irriżulta li ġie irrapurtat misruq minn persuna ta’ nazzjonalita` barranija nhar it-13 ta’ Settembru, 2017.  L-arrestat, Rumen ta’ 47 sena ġie mressaq il-Qorti, nhar il-Ħamis 21 ta’ Settembru, 2017 fejn ġie akkużat b’serq u li kien reċediv b’sentenzi ta’ Qrati barranin fosthom; ta’ Franza, l-Olanda u r-Rumanija fuq l-istess reat ta’ pick-pocketing.  Huwa wieġeb ħati għall-akkużi miġjuba fil-konfront tiegħu u ntbagħat 7 xhur priġunerija. 

Il-Pulizija qed tissokta b’aktar investigazzjonijiet u rondi f’postijiet frekwentati minn bosta sabiex tipprevjeni dan ir-reat.