Żewġ reliġjużi, jiġifieri sorijiet jew patrijiet, ġew sospiżi kompletament mill-qadi ta’ dmirijiethom wara li rriżultaw erba’ akkużi ta’ abbuż sesswali fuq adulti vulnerabbli.
Dan joħroġ proprju mir-rapport annwali għall-2024 tas-Safeguarding Commission fi ħdan l-Arċidjoċesi ta’ Malta. Din il-kummissjoni, immexxija minn Mark Pellicano, ippreżentat ir-rapport tagħha waqt konferenza tal-aħbarijiet il-Ħamis filgħodu.
Jirriżulta li reliġjuż wieħed biss ġie riferut lill-awtoritajiet minħabba li l-vittmi fil-każ l-ieħor, li seħħ ingħad li seħħ għaxar snin ilu, irrifjutaw li jipproċedu b’rapport mal-Pulizija. Dan minkejja li l-Kummissjoni offrietilhom l-għajnuna kollha tagħha biex tassistihom.
Fid-disa’ każ ta’ adulti vulnerabbli, ingħad li l-vittmi wkoll ma ridux ikomplu bil-proċeduri kriminali.
F’każ separat, li din il-kamra tal-aħbarijiet tinsab informat bih u li ma kienx involut fir-rapport tas-sena l-oħra, għax seħħ qabel, jinvolvi saċerdot b’akkużi ta’ abbuż sesswali u li għalihom saħansitra ngħata sentenza mill-Qorti fl-aħħar jiem.
Sadanittant is-sena l-oħra tliet saċerdoti djoċesani oħrajn ġew akkużati b’xi tip ta’ abbużi, fosthom dak emozzjonali, ksur ta’ konfini, abbuż spiritwali u abbuż ta’ poter.
Matul l-2024 il-kummissjoni fi ħdan il-Knisja rċeviet ukoll 33 riferiment ta’ allegat abbuż minn saċerdoti, reliġjużi jew lajċi.
Minn dawn 19 kienu jinvolvu minuri li, fi żmien tal-allegat abbuż, kienu taħt it-18-il sena, filwaqt li 14 oħrajn kienu jinvolvu adulti f’qagħda vulnerabbli. Ħamsa minn dawn il-każi jinvolvu allegazzjonijiet li jmorru lura b’għaxar snin jew iżjed.
Fil-konferenza tal-aħbarijiet ingħad li każi, li skont il-Kummissjoni tqis li setgħu jiġu sostanzjati u li kienu jinvolvu minuri, kien hemm biss wieħed, fejn dan kien hemm il-prattika tal-professjoni ħażina.
Is-sena li għaddiet il-Kummissjoni kienet attiva wkoll fil-prevenzjoni u t-taħriġ, fejn tat madwar 60 sessjoni ta’ taħriġ u seminars, li minnhom ibbenefikaw aktar minn 2,360 persuna, inkluż dawk li ma jaħdmux fil-Knisja.
Il-Kummissjoni wettqet ukoll eżerċizzji ta’ verifika u konformità biex tiżgura li kull min jagħti servizz fil-Knisja jissodisfa r-rekwiżiti ta’ safeguarding. Dan ir-rapport ma jkoprix id-Djoċesi t’Għawdex li waqqfet il-Kummissjoni tagħha.
Jekk xi ħadd hu vittma jew jaf min hu vittma jista’ jagħmel kuntatt fuq in-numru 22470950 jew permezz ta’ imejl fuq info@safeguarding.mt.
“Inħeġġu lil kulħadd li jew jaf b’xi każ jew għadda minn xi każ biex jirrapporta għandna. Biex aħna ninvestigaw, nissapportjawh u nakkumpanjawh ifittex id-drittijiet kollha u nassiguraw li l-ebda persuna oħra ma tgħaddi minn dak li allegatament għaddiet minnha hi.”
Mark Pellicano, Kap tas-Safeguarding
