Żewġ penalties, wieħed kull taqsima kienu biżżejjed biex Floriana jwarrbu l-isfida ta’ Hibernians u jiksbu tliet punti oħra biex reġgħu qabżu waħedhom fit-tieni post tal-klassifika żewġ punti biss wara l-leaders Birkirkara.
Floriana fetħu fuq l-attakk u ħolqu l-ewwel periklu fit-tieni minuta meta minn freekick ta’ Jake Grech, Zammit Lonardelli xxuttja barra mill-qrib.
Fis-7 minuta l-istess Zammit Lonardelli sab ix-xibka imma l-goal gie mħassar għal offside.
In-naħa l-oħra fl-14-il minuta Felicio Carvalho pprova jikkonkludi minn qagħda xi ftit angolata imma l-goalkeeper Furjaniż Mafoumbi interċetta tajjeb.
Floriana skurjaw goal ieħor li pero’ gie mħassar għal offside bl-iskorer ikun Franklin Sasere.
Floriana baqghu l-aktar aggressivi matul l-ewwel taqsima u ġew ippremjati għall-isforzi tagħhom fit-33 minuta meta r-referee Malcolm Spiteri saffar għal penalty f’azzjoni li fiha l-goalkeeper Sacco iffawlja lil Sasere. Kien l-istess Franklin Sasere li skorja mill-11-il metru biex poġġa lill-Greens fil-vantaġġ.
Hibernians ippruvaw iwettqu reazzjoni mmedjata hekk kif fis-36 minuta Alex Bruno Da Souza qassam lil Jurgen Degabriele li ttanta xortiħ b’xutt minn tarf il-kaxxa li għadda ftit għoli.
Fit-tieni taqsima Hibernians urew titjib fil-logħob tagħhom u b’daqsxejn aktar attenzjoni fil-konklużjonijiet setgħu anke kisbu l-goal tad-draw, iżda dan qatt ma wasal, anzi kienu Floriana li għamlu ċert mir-rebħa lejn it-tmiem.
Fis-47 minuta Hibernians sabu x-xibka permezz ta’ Alex Bruno Da Souza iżda l-goal ġie mħassar għal offside ieħor.
F’reazzjoni mmedjata minuta wara kienu Floriana li setgħu skurjaw meta Zammit Lonardelli laħaq il-ballun qabel il-goalkeeper Sacco imma ma kkontrollax tajjeb u ċ-ċans intilef.
Fit-63 minuta Sacco salva tajjeb xutt ta’ Zammit Lonardelli bil-Pawlisti jwieġbu fid-69 minuta b’daqqa ta’ ras ta’ Felicio Carvalho salvata mill-goalkeeper Furjaniż Mafoumbi.
Fil-71 minuta Jurgen Degabriele falla ċans tajjeb li jġib id-draw meta xxuttja għoli mill-qrib minn cross ta’ Bastianos, waqt li l-istess għamel Bjorn Kristensen fil-75 minuta meta xxuttja għoli mill-qrib wara li rċieva mingħand Alfred Silas.
Floriana ma qagħdux lura u fis-86 minuta Mattia Veselji kellu xutt jaħbat mal-wieqfa u jispiċċa barra.
Fid-89 minuta Floriana rebħu t-tieni penalty meta l-goalkeeper Sacco waqqa’ lil Veselji fil-kaxxa, b’Sacco jintwera t-tieni karta safra u jitkecca. Hibernians ma setgħux idahhlu goalkeeper flok Sacco għax kienu diga’ wettqu ħames sostituzzjonijiet biex floku bejn il-lasta dahal Bjorn Kristensen.
Inkariga ruhu mill-penalty l-ex Jake Grech li ma falliex biex issiġġilla r-rebħa Furjaniża.
Referee: Malcolm Spiteri
Plejer tal-Logħba: Carlo Zammit Lonardelli (Floriana FC)
