Żewġt irġiel qed jinżammu arrestati mill-Pulizija wara li investigazzjoni mill-Iskwadra ta’ Kontra d-Droga lbieraħ filgħaxija wasslet għal sejba ta’ droga u ammont sostanzjali ta’ flus kontanti.
L-irġiel, li għandhom 22 sena u 24 sena mill-Imsida u minn Santa Venera rispettivament, ġew arrestati wara tfittxija f ‘Paceville.
Ir-raġel ta’ 22 sena nstab fil-pussess ta’ 12-il pillola ecstasy u €240 flus kontanti, filwaqt li r-raġel ta’ 24 sena kellu €3,600 fi flus kontanti.
L-investigazzjoni tal-Pulizija għadha għaddejja, u mhux eskluż li l-ġuvintur jitressqu l-Qorti fil-jiem li ġejjin.
