Ilbieraħ, Eġizzjan ta’ 19-il sena ġie arrestat wara li nqabad b’ammont ta’ droga sintetika waqt ronda mill-Pulizija tad-Distrett tal-Belt Valletta.
Waqt ronda fi Ġnien Herbert Ganado, il-Floriana, għall-ħabta tas-siegħa neqsin kwart ta’ filgħodu, il-pulizija nnutaw persuni bilqiegħda f’parti mudlama tal-ġnien u għaldaqstant qam suspett fihom u avviċinawhom.
Waqt li bdew ikellmuhom iż-żgħażagħ bdew jaġixxu b’mod suspettuż, għalhekk saret tfittxija fuqhom u fil-pussess ta’ wieħed miż-żgħażagħ instabu 12-il pakkett b’sustanza suspettata droga sintetika, f’ċirkostanzi li juru li ma kinitx għall-użu personali tiegħu.
Iż-żagħżugħ ġie arrestat u mistenni jitressaq il-Qorti dalgħodu, għall-ħabta tal-ħdax quddiem il-Maġistrat tal-Għassa Dr Gabriella Vella b’akkużi relatati.
