Zabbar SP dawru telfa f’rebħa ta’ 2-1 kontra Balzan, biex komplew ikabbru l-problemi għal dawn tal-aħħar.
Kienu Balzan li ħolqu l-ewwel periklu wara biss minuta meta xutt minn tarf il-kaxxa tal-akkwist il-ġdid Raphael Floro laqat sieq il-wieqfa.
Zabbar wieġbu erba’ minuti wara meta Diogo Tavares għadda tajjeb lejn Stefan ilic li mill-viċin laqat il-mimduda.
Fl-10 minuta, il-coach ta’ Balzan Daryl Willard kien kostrett jaffettwa sostituzzjoni sfurzata meta weġġa għalihom il-player Elvis Kamsoba hekk kif deher li ġibed il-hamstring, biex minfloku daħal jilgħab is-sostitut Benjamin Hili.
U proprju żewġ minuti biss wara l-istess BENJAMIN HILI wara li rċieva minn cross mil-lemin kellu t-tentattiv tiegħu mill-viċin jintemm ġewwa.
Zabbar wieġbu fid-19-il minuta meta daqqa ta’ ras ta’ Kristijan Keqi għaddiet ftit barra.
Huma komplew fuq l-offensiva u sitt minuti wara, kien l-istess Keqi li ħoloq il-periklu meta wara li rċieva minn cross mil-lemin, kellu daqqa ta’ ras oħra li għaddiet ftit għoli.
Kulma jmur komla d-dominju assolut taż-Zabbarin u fit-42 minuta freekick insidjuż ta’ Vinicius de Paiva kważi ħasad għal kollox lill-goalkeeper ta’ Balzan, Dylan Ciappara, li dawwar f’corner b’diffikultá.
Fil-ftuħ tat-tieni taqsima, Zabbar komplew fejn ħallew fi tmiem l-ewwel taqsima u fid-49 minuta meritatament ġabu l-iskor indaqs meta s-sostitut Marcelo Barros għadda tajjeb lejn BRIAN GAMBARTE li mill-viċin tefa’ ġewwa.
Huma komplew fuq l-offensiva u fis-57 minuta, wara li rċieva minn cross ta’ Tavares, Keqi mill-viċin tefa’ barra.
Zabbar reġgħu ħolqu l-periklu fis-66 minuta meta Gambarte għadda tajjeb lejn Marcelo Santos bix-xutt tiegħu ikun imblukkat minn difensur avversarju.
Bl-aktar mod meritat, Zabbar skorjaw il-goal tar-rebħa fit-80 minuta meta wara li rċieva minn cross fil-baxx, MARCELO BARROS SANTOS, kien fil-post it-tajjeb fil-mument opportun u minn taħt il-lasta tefa’ ġewwa.
Huma komplew jipproduċu l-isbaħ logħob u fis-87 minuta xutt ta’ Marcelo Barros Santos minn barra l-kaxxa ġie salvat parzjalment minn Ciappara, biex mir-rebound, is-sostitut Martim Ausgusto Fereira kellu t-tentattiv tiegħu jistampa mal-mimduda.
Zabbar komplew jamministraw il-vantaġġ minimu li kellhom sa tmiem il-partita.
Referee: Emanuel Grech
Plejers tal-Logħba:- Brian Gambarte (Zabbar)
