L-Assoċjazzjoni għall-Annimali Abbandunati ppublikat ritratti li juru każ ta’ kelba li kienet salvata minn ħalq il-mewt fl-Mqabba. Il-kelba, bl-isem ta’ Bella, kienet ikkonfiskata mis-sid li ħallietha bil-ġuħ tant li kienet tiżen biss 14.4kg, meta suppost tiżen 30kg.
L-Assoċjazzjoni qalet li l-kelma ‘xokkanti’ lanqas biss tiddeskrivi l-istat ta’ ġuħ li kienet fih Bella. Wara li aġixxiet malajr u avżat lill-Animal Welfare, f’temp ta’ nofs siegħa dawn ikkonfiskaw lill-kelba minn sidha.
Allegatament, din mhix l-ewwel darba li din is-sid ħaqret l-annimali, hekk kif kellha kelb ieħor qabel Bella.
“Ftit jiem oħra u Bella kienet tmut” – qalet l-Assoċjazzjoni.
Ftit ħin wara, tellgħu filmat tagħha u awguraw li tikseb il-fejqan ta’ malajr minn idejn is-sid li kellha.
