Se jsir xogħol ta’ titjib tar-roundabout ta’ biswit il-Mosta Technopark u tal-faċilitajiet tal-ivvjaġġar bil-mixi qribha, għal inqas riskji ta’ aċċidenti għal dawk li jgħaddu minn din ir-rotta.
Id-disinn tar-roundabout ser jinbidel biex tiżdied l-effiċjenza u s-sigurtà tar-rotta minn Ħal Lija lejn il-qalba tal-Mosta. Fl-istess waqt, il-passaġġ bis-sinjali tad-dwal għall-qsim tat-triq bil-mixi li hemm viċin, fil-kisra lejn Triq Pantar, ser jitressaq ftit metri lilhinn biex ikomplu jonqsu r-riskji ta’ aċċidenti. Ir-roundabout ta’ maġenb il-Mosta Technopark tgħaqqad in-Naxxar (Vjal il-Labour), Ħal Lija (Triq il-Mosta) u l-Mosta (Triq il-Belt Valletta), f’waħda mir-rotot ewlenin minn u lejn it-tramuntana tal-pajjiż. Illejla, it-Tnejn 17 ta’ Settembru, u fl-iljieli ta’ wara sal-aħħar tal-ġimgħa, bejn id-21:00 u l-05:00, il-kuntratturi tal-aġenzija ser jagħlqu l-aċċess għar-roundabout u l-korsiji li jagħtu għaliha, sabiex ikunu jistgħu jlestu x-xogħol meħtieġ bil-lejl u jiġi evitat li jingħalqu partijiet ta’ dawn it-toroq matul il-jum. Dawk li jivvjaġġaw minn dawn l-inħawi mħeġġa jużaw ir-rotot alternattivi mmarkati b’tabelli mal-ġnub tat-triq. Uffiċċjali tal-immaniġġjar tat-traffiku ser ikunu fl-inħawi tax-xogħlijiet sabiex jgħinu lir-residenti u dawk li jgħaddu minn dawn l-inħawi.
Ix-xogħlijiet f’din ir-roundabout ser ikomplu jsaħħu l-proġetti ta’ titjib li tlestew is-sajf tas-sena l-oħra fit-toroq ewlenin bejn Ħal Lija u l-Mosta, u li ssarfu fi tnaqqis sostanzjali fil-ħin tal-ivvjaġġar f’din ir-rotta. Xogħlijiet oħra ta’ titjib tat-toroq fl-inħawi, għal aktar effiċjenza u sigurtà fit-trasport, qed isiru wkoll fir-roundabout tat-Telgħa t’Alla u Ommu, bejn Burmarrad u l-Birguma, fl-inħawi tan-Naxxar. Dawn ix-xogħlijiet mistennija jitlestew dan ix-xahar ukoll.
