Infrastructure Malta qed twettaq xogħol ta’ manutenzjoni fuq iż-żewġ pontijiet li jgħaqqdu l-Imrieħel Bypass mal-Marsa-Ħamrun Bypass u għadd ta’ xogħlijiet oħra fl-istess rotta, illejla u matul il-ġimagħtejn li ġejjin.
Dawn ix-xogħlijiet, li jinkludu tiswijiet u manutenzjoni ta’ wiċċ it-triq fuq iż-żewġ pontijiet, kif ukoll it-tqegħid tal-aħħar saffi ta’ asfalt tal-karreġġjati tal-Marsa-Hamrun Bypass, li għadhom kif inbnew mill-ġdid, ser isiru matul il-lejl u fi tmiem il-ġimgħa, sabiex jitnaqqsu d-diffikultajiet lil dawk li jivvjaġġaw f’dawn l-inħawi.
Illejla, (26 ta’ Settembru), mis-sitta (18:00) sal-ħamsa ta’ għada filgħodu (05:00), iż-żewġ pontijiet li jgħaqqdu l-karreġġjata fid-direzzjoni tan-nofsinhar tal-Imrieħel Bypass mal-Marsa-Ħamrun Bypass ser ikunu magħluqin sabiex jibdew it-tiswijiet meħtieġa. Fost oħrajn, it-triq fuq wieħed mill-pontijiet ser tiġi livellata mill-ġdid sabiex tingħeleb diffikultà ta’ għargħar li hemm f’din il-parti tar-rotta.
Fl-istess lejl, ħaddiema oħra ser jibdew l-aħħar xogħol ta’ asfaltar fit-telgħa li tgħaqqad il-karreġġjata tan-nofsinhar hekk kif toħroġ mill-mini ta’ Santa Venera, fid-direzzjoni tal-Marsa-Ħamrun Bypass. Din it-triq ser tingħalaq mis-sitta ta’ filgħaxija (18:00) fid-direzzjoni tal-Marsa, filwaqt li l-konnessjoni bejn l-istess karreġġjata għall-mina li tagħti għal Ħal Qormi u l-Imrieħel Bypass tingħalaq aktar tard, fid-disgħa (21:00). It-triq u l-mini jinfetħu f’kull direzzjoni fil-ħamsa, għada filgħodu (05:00).
Din it-telgħa twessgħet b’korsija oħra fil-ġimgħat li għaddew sabiex jitneħħa l-ixkiel li kien jinħoloq hekk kif iż-żewġ korsiji ħerġin mill-mini ta’ Santa Venera kienu jingħalqu għal waħda fil-Marsa-Ħamrun Bypass. Permezz ta’ proġett ta’ €5 miljun li beda aktar kmieni din is-sena, il-Marsa-Ħamrun Bypass twessa għal sitt korsiji sabiex tingħeleb din id-diffikultà filwaqt li titjieb l-effiċjenza u s-sigurtà ta’ konessjonijiet oħra ta’ din ir-rotta ma’ toroq oħrajn fl-inħawi. Dan l-investiment qed inaqqas il-ħinijiet tal-ivvjaġġar f’din it-triq b’42 fil-mija, filwaqt li jtejjeb il-kwalità tal-arja hekk kif jonqsu wkoll l-emissjonijiet ikkawżati mill-konġestjoni tat-traffiku.
Il-korsiji ġodda u dawk mibnija mill-ġdid tal-Marsa-Hamrun Bypass infetħu għall-pubbliku l-ġimgħa li għaddiet. L-aħħar xogħlijiet tal-proġett, fosthom it-tqegħid tas-saff ta’ fuq nett taż-żewġ karreġġjati, ser isiru bil-lejl, u fis-Sibtijiet u l-Ħdud, matul il-ġimagħtejn li ġejjin. Il-karreġġjata tan-nofsinhar ser tingħalaq f’kull ħin minn kmieni s-Sibt 29 ta’ Settembru sal-għada l-Ħadd filgħodu, u bil-lejl bejn it-Tnejn l-1 ta’ Ottubru u l-Erbgħa 3 ta’ Ottubru. Il-kumplament tax-xogħol fuq il-karreġġjata tat-tramuntana tal-istess triq ser isir fl-istess ħinijiet, il-ġimgħa ta’ wara, bejn is-Sibt 6 u l-Erbgħa 10 ta’ Ottubru.
Dawk li jivvjaġaw minn dawn l-inħawi huma mħeġġa jsegwu t-tabelli bid-direzzjonijiet għal toroq alternattivi, jew jgħaddu minn rotot oħra. Uffiċċjali tal-immaniġġjar tat-traffiku ser ikunu stazzjonati fl-inħawi sabiex jgħinu lil dawk li jkunu f’diffikultà.
Il-proġett tal-Marsa-Ħamrun Bypass, li jista’ jiġi konfinanzjat mill-Fond ta’ Koeżjoni tal-Unjoni Ewropea, kien ippjanat li jitlesta f’April li ġej. Madankollu, Infrastructure Malta qed tippjana li tlestih f’Ottubru, xhur qabel oriġinarjament skedat.
Din il-ħidma tifforma wkoll parti minn investiment ta’ €14.2 miljun li Infrastructure Malta qed tagħmel bix ittejjeb ir-rotta ewlenija bejn in-nofsinhar u ċ-ċentru tal-pajjiż, minn Triq Aldo Moro fil-Marsa sal-mini ta’ Santa Venera u l-Imrieħel Bypass f’Santa Venera u Ħal Qormi. Dan l investiment jinkludi wkoll żewġ proġetti oħra, fosthom it-tieni fażi tal-Marsa Junction Project, fil-konnessjoni tat-toroq ħdejn iċ-ċimiterju tal-Addolorata u l-bini mill-ġdid ta’ partijiet minn Triq Diċembru 13 u Triq Aldo Moro, li wkoll ser jitlestew f’Ottubru.
Flimkien, dawn it-tliet proġetti qed jiftħu aktar minn 15-il kilometru ta’ toroq ġodda jew mibnija mill-ġdid u għaxar konnessjonijiet bejn toroq differenti mtejba b’infrastruttura ġdida, sabiex inaqqsu l-ħin tal-ivvjaġġar, iżidu s-sigurtà fit-toroq u jtejbu l-kwalità tal-arja fl-inħawi.
Aktar tagħrif jew għajnuna dwar dawn ix-xogħlijiet jistgħu jinkisbu minn Infrastructure Malta fuq 2334 1000 jew info.im@infrastructuremalta.com.
