Xjenza Malta saret l-ewwel aġenzija governattiva li qed tipprovdi lill-ħaddiema tagħha muturi elettriċi, biex ikunu jistgħu jaqdu d-dmirijiet tax-xogħol b’mod aktar effiċjenti.
Din l-inizjattiva mhux biss tgħin fit-tnaqqis tat-traffiku, iżda tikkontribwixxi wkoll għat-tnaqqis tal-emissjonijiet tal-karbonju, li hu pass importanti lejn trasport aktar sostenibbli.
Dan il-proġett jagħmel parti mill-isforzi tal-Gvern, kif imħabbra mill-Ministru għat-Trasport, Chris Bonnet, biex jiġu indirizzati l-isfidi tat-traffiku u jiġi promoss l-użu ta’ mezzi aktar ekoloġiċi f’Malta.
Fil-fatt l-inizjattiva ta’ Xjenza Malta tikkumplimenta l-għanijiet ambjentali tal-pajjiż, filwaqt li tappoġġja l-impenn tal-Gvern biex inaqqas l-emissjonijiet tal-karbonju u jippromwovi t-trasport sostenibbli.
Minbarra hekk, Xjenza Malta installat ukoll stazzjonijiet għall-iċċarġjar tal-vetturi elettriċi fil-bini tagħha. Dawn se jkunu disponibbli għall-impjegati li jagħżlu vetturi elettriċi u jipprovdu soluzzjoni ta’ ċċarġjar affidabbli u konvenjenti waqt il-ħinijiet tax-xogħol.
