F’xalata ta’ goals, Sliema Wanderers sabuha wisq faċli meta għelbu l-isfida tal-Għawdxin ta’ Għajnielem bl-iskor kbir ta’ 8-0, fejn sal-ewwel taqsima huma diġá kienu skorjaw xejn inqas minn seba’ goals.
Kien Mohamaed Awad li fetaħ l-iskor għall-Wanderers wara biss żewġ minuti, u żewġ minuti wara, Simon Zibo rdoppja l-iskor għalihom. Adam Magri Overend skorja t-tielet goal fit-12-il minuta u Simon Zibo żied goal ieħor 10 minuti wara.
Geoffrey Edwin Achempong għamilhom ħamsa għall-Blues fit-33 minuta u erba’ minuti wara Vito Plut skorja s-sitt goal ta’ Sliema. Steve Pisani skorja penalty żewġ minuti minn tmiem l-ewwel taqsima u żewġ minuti mill-ftuħ tat-tieni taqsima, iż-żagħżugħ Russell Borg issiġilla r-rebħa kbira Slimiża permezz tat-tmien goal.
Il-kumplament tal-partita kien biss formalitá f’dik li iktar tqieset bħala sessjoni ta’ taħriġ għall-Wanderers.
Referee: Matthew De Gabriele
