Il-Ġimgħa filgħaxija, il-Partit Laburista tella’ Workshop ieħor f’forma ta’ diskussjoni miftuħa bħala parti mill-attivitajiet tal-Konferenza Ġenerali tal-istess partit bit-tema ‘Insaħħu Malta Tagħna.’
Fil-lukanda ewlenija Kempinski f’San Lawrenz Għawdex, bosta pparteċipaw sabiex iwasslu l-ideat tagħhom b’rabta ma’ oqsma differenti li jolqtu lill-gżira tat-Tliet Għoljiet.
Għal din l-attività, bħal oħrajn qabilha, attenda wkoll il-Prim Ministru u Mexxej Laburista Robert Abela hekk kif sema’ l-ideat u s-suġġerimenti ta’ bosta persuni minn oqsma u setturi differenti.
Il-Prim Ministru Robert Abela sostna wkoll kif dawn l-attivitajiet ta’ diskussjoni huma importanti ħafna għaliex jinċentivaw soċjetà parteċipattiva favur futur aħjar għal pajjiżna.
“Dik tibqa’ l-ħidma tagħna li aħna nibqgħu nkunu f’dan il-pajjiż li tifhem li kull persuna f’dan il-pajjiż għandu ħafna u ħafna kontribut x’jagħti u llejla rajt dik il-fjamma f’kull wieħed u waħda minnkom li nixtieq nibqa’ ninkoraġġiha. Imma diskussjoni bħal tal-lejla ma tkun tfisser kważi xejn jekk fit-tmienja ta’ Ġunju nagħżlu li nkunu siekta.”
Robert Abela – Prim Ministru
Intant fost il-persuni li ħadu sehem fid-diskussjoni, tkellem Christian Zammit, eks Sindku Laburista tax-Xagħra Għawdex fejn tenna li fl-aħħar sena ra miżuri sinifikanti li qed jimplimenta l-Partit Laburista fosthom bil-protezzjoni ta’ Ħondoq ir-Rummien u anka inċentivi ġodda fuq il-Kunsilli Lokali.
“Ħadt pjaċir ukoll ninnota li dan l-aħħar il-Gvern ħabbar li qed iniedi skema biex tingħata aktar saħħa u għajnuna finanzjarja lill-Kunsilli Lokali biex verament aħna nibdew inwasslu l-proġetti li għandhom bżonn iċ-ċittadini u mhux immorru nitkarrbu għand xi ministeru jew ieħor inwasslu xi proġett. Qed ninnota allura Gvern li verament jider fuq dan il-punt ukoll qiegħed jistinka u jaħdem fuq dan is-suġġett bis-saħħa.”
Christian Zammit – Kandidat tal-PL
Fil-fatt, fl-aħħar tad-diskors tiegħu Christian Zammit ħabbar li se jkun qed jerġa’ jikkandida ruħu fl-elezzjonijiet tal-Kunsilli Lokali mal-Partit Laburista.
Intant id-diskussjoni laqtet diversi temi u suġġetti li jolqtu l-gżira Għawdxija. Ewlenin fosthom kien il-qasam tal-iżvilupp f’Għawdex fejn Edward Scerri, perit u missier ta’ erbat itfal tkellem dwar l-ispazji miftuħa f’Għawdex stess u ssuġġerixxa li hemm bżonn iktar żvilupp sostennibli f’din il-gżira.
“Jekk inżommu dawn l-ispazji miftuħa u nagħmlu l-aħjar użu minnhom anka billi pereżempju nagħtu baġit lill-kunsilli li jista’ jiddedikah totalment f’dawn l-open spaces kemm biex iżomm l-upkeep tagħhom u biex spazji oħrajn li għandhom il-potenzjal jiżvillupahom għall-aħjar użu tal-komunità u naħseb li b’hekk qed inkunu qed nagħmlu effett tajjeb ħafna fu qis-soċjetà.”
Edward Scerri – Perit
Intant Dr Joseph Grech tkellem dwar il-qasam tal-agrikoltura f’pajjiżna u faħħar l-inċentivi li għamel il-Gvern f’dan il-qasam biex kumpaniji f’pajjiżna jkunu jistgħu jifjorixxu.
“Li kieku ma kinux għall-fondi komunitarji żgur li llu il-ġurnata minix nipproduċi l-inbid. Żgur li ma kienx ikolli l-unika liċenzja ta’ distillazzjoni li hawn fil-pajjiż. Dawn kollha kienu inċentivi li tħaddmu tajjeb ħafna minn dan il-Gvern sabiex kien hemm investimenti u investimenti varji ta’ kupaniji varji bħal ma huma tiegħi biex bqajna mexjin ’il quddiem.”
Joseph Grech – Direttur ta’ kumpanija
