Kull min se jżur il-Belt Valletta fil-jiem li ġejjin jista’ jaqsam ftit mill-esperjenzi li għexu studenti tal-iskola sekondarja tal-Kulleġġ Savio minn lenti ta’ kamera tar-ritratti.
Erbatax-il student kellhom l-opportunità li jagħżlu l-fotografija bħala suġġett applikat meta kienu fid-disa’ sena tal-iskola, u saħansitra jagħżluh bħala suġġett ewlieni għall-O’Levels. Minbarra l-fotografija, setgħu jagħżlu wkoll ir-robotika, il-mużika u l-arkeoloġija.
Illum dawn l-istudenti waslu fil-ħdax-il sena tal-istudi tagħhom, u l-ħidma tagħhom tul dawn l-aħħar tliet snin tinsab eżebita permezz ta’ 60 ritratt f’Palazzo Ferreria, ftit passi ’l bogħod mid-daħla tal-Belt Valletta.
Il-wirja tinkludi ritratti minn esperjenza li l-istudenti għexu għal sitt ijiem f’Turin, flimkien mal-għalliem tagħhom Christopher Azzopardi. Huma żaru din il-belt Taljana speċifikament biex josservawha u jaqbdu l-iktar xeni interessanti peremezz tar-ritratti.
Din il-wirja ġiet inawgurata mill-Ministru għat-Turiżmu u l-Protezzjoni tal-Konsumatur, Clayton Bartolo, li hu stess kien jattendi Savio College.
Il-wirja hija miftuħa kuljum mid-9am sas-7pm u se tibqa’ għaddejja sal-31 ta’ Jannar, meta s-Salesjani jiċċelebraw il-festa ta’ Don Bosco.
