Kollox huwa lest biex nhar it-Tnejn 1 ta’ Ottubru, 2018 tibda l–avventura l-ġdida ta’ HazZzard fit-20:30 fuq ONE.
Periklu, avventura, sfidi diffiċli, adrenalina, taħlita ta’ emozzjonijiet. Dawn huma l-elementi prinċipali li jagħtu timbru lil programm HazZzard. Timmaġinak tgħix il-bogħod mill-kumdita ta’ darek u tgħaddi numru ta’ ġimgħat mingħajr flus, ħelu, ikel u xorb limitat u għal min ipejjep, minghajr sigaretti? Timmaġinak tgħaddi l-lejl barra fit-triq u tgħix mingħajr l-aktar affarijiet essenzjali? Tgħaddi minn moħħok li tkun f’ sitwazzjoni li fiha trid tittallab l-ikel u x-xorb minghand in-nies biex tgħix? Ta’ min isemmi ukoll li waħda mill-isfidi li jaffaċċjaw il-parteċipanti hija, li fl-ebda ħin waqt il-ġbid tal-avventura barra minn Malta, ma jkollhom kuntatt mal-familjari tagħhom f’ Malta.
Din hija l-esperjenza unika u eċċitanti li jgħaddu minnha l-protagonisti waqt l-avventura ta’ HazZzard. Ta’ min jgħid, li minbarra d-diversi sitwazzjonijiet diffiċli li l-parteċipanti jiltaqgħu magħhom matul l-avventura, it-tim tal-produzzjoni joħloq sitwazzjonijiet biex jagħmilha aktar difficli. Biżżejjed ngħidu li t-tim tal-produzzjoni qabel tibda l-avventura, jistudja x’ inhuma dawk l-affarijiet li huma ghall-qalb kull protagonist, sabiex waqt l-avventura il-parteċipant jigi mċaħħad minn dawk l-affarijiet li jħobb. Jiskopri ukoll minn qabel il-biżgħat tal-parteċipanti, u waqt l-avventura joħloq sitwazzjonijiet marbuta ma’ dawk l-istess bizghat. Dawn is-sitwazzjonijiet jagħmlu l-avventura iktar interessanti.
Trid tkun parteċipant ta’ HazZzard 2019?
Biex tapplika trid sempliċiment tidħol fil-paġna ta’ HazZzard fuq facebook u thalli messaġġ privat. It-tim tal-produzzjoni jibgħatlek il-formula tal-applikazzjoni. L-applikant imbagħad jintalab biex jattendi għall-intervista, biċ-ċans li jintagħżel għall-programm. Biex persuna tapplika jrid ikollha 18-il sena.
HazZzard jibda it-Tnejn 1 t’Ottubru, fit-20:30 fuq ONE.
