Matul is-sena li għaddiet, bosta reġgħu kienu mxenqin u għatxana għall-kunċert anwali ta’ Rockestra. Madankollu minħabba l-pandemija dan ma kellux ikun.
Saħansitra din is-sena ħafna kien xettiċi jekk Rockestra hux se jerġa’ jsir minħabba l-pandemija. Madankollu mhux biss din is-sena Rockestra rritorna, iżda rritorna bil-kbir.
Fil-fatt għal dan l-ispettaklu ta’ mużika rock bl-għajnuna wkoll tal-Orkestra Filarmonika ta’ Malta, għall-edizzjoni ta’ din is-sena attendew iktar minn ħamest elef ruħ f’żewġ iljieli separati mill-isbaħ.
“Times Like These” kienet it-tema ta’ Rockestra 2021 u dan bil-ħsieb li tirrifletti ż-żmien li għaddew minnhom l-artisti u l-Malta Community Chest Fund minħabba l-Covid 19.
Aktar minn għoxrin kantant u ħamsin mużiċist kienu preżenti biex iqajmu l-briju fost l-udjenza. Sforz il-miżuri li jimmitigaw it-tixrid tal-każijiet ta’ Covid-19, minħabba li min jattendi kellu jibqa’ bilqiegħda, dan wassal biex l-organizzaturi ħasbu f’repertorju ta’ mużika differenti minn tas-soltu. B’hekk il-mużika klassika mħallta ma’ rock ġiet apprezzata ħafna iktar. Dan filwaqt li tul iż-żewġ serati ġew applikati l-kunċetti ta’ bubbles f’każ ta’ każ pożittiv ta’ Covid-19.
Tul is-serati taħlita ta’ artisti lokali ingħaqdu fuq il-palk ta’ Rockestra u li ħafna minnhom m’għandhom bżonn l-ebda introduzzjoni. Dawn inkludew Ozzy Lino, Klinsmann, Matthew James, Petra u New Victorians, fost ħafna oħrajn.
Waqt il-kunċert spikkat ukoll il-parteċipazzjoni tal-udjenza fejn fost oħrajn bdew ikantaw u jċapċpu mad-diska We Will Rock You.
Fost il-mistiedna distinti attenda wkoll il-President George Vella li esprima s-sodisfazzjon tiegħu għal din l-attività mtella b’tant suċċess u b’kawża tajba.
Dan hekk kif bħal kull sena Rockestra sar b’risq il-Malta Community Chest Fund fejn fi żmien bħal dan tkun fi bżonn kbir ta’ appoġġ sabiex tkompli tgħin lil dawk li jkunu qed jaffaċċjaw mard rari bi bżonn ta’ kura barra minn xtutna.
