L-Unjoni Ewropea kellha kliem ta’ tifħir għall-aħbar li Malta huwa l-ewwel pajjiż fl-Ewropa li laħqet l-immunità għall-virus tal-Covid-19, tragward importanti waqt il-pandemija globali.
Dan intqal mill-Prim Ministru Malti Robert Abela f’kummenti lill-midja fi tmiem Summit Speċjali tal-Kunsill Ewropew ta’ jumejn, fi Brussell.
Dr Abela spjega kif il-mexxejja Ewropej staqsewh dwar is-suċċess tal-programm ta’ vaċċinazzjoni li għandu pajjiżna.
Huwa qal, “Ferħu magħna. Nistqarr illi ħafna mexxejja ġew jitkellmu miegħi u staqsewna kif ħdimna u għalhekk spjegat il-mod kif imxejna mill-bidu nett, sa mill-bidu tal-ordnijiet tal-vaċċin sa meta ġejna biex nagħtu l-vaċċin u raw illi Malta pajjiż li tieħu l-affarijiet bis-serjetà, pajjiż li huwa organizzat, li jaf imexxi l-affarijiet tiegħu. Fl-aħħar mill-aħħar, issa wkoll niċċelebraw meta l-bqija tal-istati membri tal-Unjoni Ewropea, il-bqija tad-dinja, wara kollox tilħaq dan it-tragward tant importanti għaliex irridu nifhmu li mhux biss pajjiżna, li jrid jilħaq l-immunità għall-virus, imma d-dinja kollha. Aktar ma nilħqu dak it-target malajr, aktar ikun tajjeb għal kulħadd.”
Il-Kunsill Ewropew laqa’ wkoll l-aħbar li l-Unjoni Ewropea qablet dwar iċ-ċertifikat tal-vaċċin, bil-Prim Ministru Robert Abela saħaq fuq l-importanza ta’ din l-għodda importanti sabiex ikun iffaċilitat il-moviment tal-persuni fl-Unjoni Ewropea.
Malta kienet minn tal-ewwel fost il-pajjiżi Ewropej li saħqet sabiex din is-sistema tidħol fis-seħħ.
Il-Prim Ministru Robert sostna: “Aħna rridu naraw li nġibu t-turiżmu ta’ kwalità lejn pajjiżna, iżda b’mod sigur ukoll u ċ-ċertifikat se jkun waħda mill-aqwa għodod li se jkollna għad-dispożizzjoni tagħna. Kienet idea li sa mill-bidu nett imbuttajnieha, bħala pajjiż u li se tkun qed tiffaċilità dan il-prinċipju bażiku tal-Unjoni Ewropea, il-moviment tal-persuni li konna mċaħħdin minnu f’dan l-aħħar xhur.”
F’dan is-summit, tul il-jum tat-Tlieta, il-mexxejja Ewropej qablu li sal-aħħar ta’ din is-sena, se jingħataw minn tal-inqas 100 miljun doża tal-vaċċin lill-pajjiżi terzi.
Hawnhekk, Dr Abela qal kif l-Unjoni Ewropea għandha responsabbiltà fuq livell globali u li tgħin lill-pajjiżi fil-bżonn permezz ta’ donazzjonijiet ta’ vaċċin lejn pajjiżi terzi, li m’għandhomx aċċess għat-tilqim.
Il-mexxejja Ewropej tkellmu wkoll fuq it-tibdil fil-klima, li sal-2050 jkun hawn ħielsa mill-karbonju.
Il-Prim Ministru Robert Abela spjega li teżisti l-ħtieġa li ssir analiżi fuq livell nazzjonali ta’ impatti ekonomiċi, ambjentali u soċjali ta’ miżuri proposti f’kull settur.
F’dan is-summit li beda t-Tnejn filgħaxija wassal biex il-mexxejja Ewropej qablu sabiex ikun hemm imposti sanzjonijiet ġodda fuq il-Belarus.
Dan hekk kif il-mexxejja Ewropej qablu li l-ebda ajruplan tal-linja tal-ajru tal-Belarus ma jgħaddi mill-ispazju tal-ajru Ewropew u l-ebda ajruplan tal-linji Ewropej ma jgħaddi mill-ispazju tal-ajru tal-Belarus.
Dan wara li l-ġurnalist mill-Belarus li huwa voċiferu kontra l-President Alexander Lukashenko ġie arrestat, hekk kif l-ajruplan tniżżel fil-Belarus.
Il-mexxejja Ewropej ikkundanaw ukoll il-ħtif tal-Prim Ministru u l-President tal-Mali minn suldati tal-pajjiż.
Dwar il-Lvant Nofsani, il-Kunsill Ewropew laqa’ l-waqfien mill-ġlied u tenna fuq l-impenn għal soluzzjoni bejn iż-żewġ stati, li din hija wkoll il-pożizzjoni li dejjem saħqet Malta.
