Iċ-ċirkostanzi u l-evidenza li instabu fit-tinda tal-patata fil-Menqa l-Marsa fejn it-tliet suspettati bil-qtil ta’ Daphne Caruana Galizia ġew arrestati, turi biċ-ċar illi sa sekondi qabel ma’ waslu l-Forzi ta’ l-Ordni fuq il-post, is-suspettati kienu fil-pussess ta’ din evidenza kruċjali u relatata mal-qtil tal-blogger u li b’mod istantanju huma ippruvaw jarmu u jahbu l-istess evidenza hekk kif raw lill-Pulizija quddiemhom nhar l-4 ta’ Diċembru.
Fil-fatt, tnejn mill-mobiles personali li kienu jużaw l-imputati instabu propju taħt it-tinda wieħed mormi mal-art ftit metri biss boghod mis-suspettati u l-ieħor instab fil-baħar u jidher li ntrema dak il-ħin tal-arrest.
Qalet dan b’ mod uffiċjali l-Pulizija b’ risposta għall-mistoqsijiet mibgħuta minn ONE News fid-dawl ta’ allegazzjonijiet li saru mid-Deputat Nazzjonalista Jason Azzopardi.
Fir-risposti tagħha il-Pulizija qalet li temmen illi li kieku l-istess suspettati kienu infurmati minn xi hadd minn qabel li huma kienu ser jigu arrestati, kieku l-istess suspettati kellhom il-hin kollu ghad-dispozizzjoni taghhom sabiex jehilsu jew jeqirdu evidenza important u inkriminanti fil-konfront tagħhom.
Il-fatt li wieħed mis-suspettati instab li kellu mobile number tal-partner tiegħu miktub fuq il-polz ta’ idejh wassal lill-investigaturi sabiex jinvestigaw din iċ-ċirkostanza ukoll.
Għal dan il-għan il-Pulizija ħassew li għandhom jagħmlu domandi speċifiċi mat-tliet suspettati, bil-għan li tigi esplorata aktar din il-linja ta’ investigazzjoni.
Il-Pulizija qalet li tinsisti u għamlita ċara li dawn id-domandi li qed jiġu ikkwotati minn media internazzjonali u meħuda mill-interrogatorju tat-tlett imputati ma għandhomx jinftehmu jew jiġu interpretati bl-ebda mod illi l-Pulizija kienet taf jew kellha ħjiel li l-istess suspettati kienu infurmati minn qabel bl-arrest tagħhom. Dan għal fatt li talli domandi issiru f’ kull xorta ta’ nvestigazzjonijiet bħal dawn.
Intant, filwaqt li jidher li xi ħadd għadda xi siltiet mit-transcripts tal-interrogazzjoni lill-mezzi tal-media internazzjonali, jew saħansitra l-kopji kollha tat-traskrizzjonijiet tal-interrogazzjoni tat-tlett imputati, sorsi u esperti legali qalu ma’ ONE News li dan huwa illegali.
Dawn is-sorsi sostnew kif filwaqt li s-smiegħ ta’ proċeduri kriminali huma pubbliċi, id-dokumenti preżentati fl-istess proċeduri ma’ jistgħux jiġu preżentati lill-Pubbliku jew wisq l-inqas lill-media.
ONE News jinsab infurmat li kien Jason Azzopardi stess fil-Qorti li qal li hu qed jiġbor ir-ritratti mill-Port il-Kbir nhar is-16 ta’ Ottubru u kif ukoll filmati li nġibdu mill-Pulizija waqt li kienu qed isegwu l-imputati fil-ġimgħat qabel dan l-arrest, għall-iben il-vittma Matthew Caruana Galizia.
Iżda ftit tal-jiem wara dawn ġew żvelati fil-media nternazzjonali.
