Fl-Oratorju tal-Konfraternità tas-Santissimu Sagrament tal-Parroċċa ta’ San Duminku fil-Belt Valletta, il-wirja tal-Mejda tal-Appostli, li ilha tittella’ għal dawn l-aħħar 240 sena sa mill-1784, tinsab miftuħa għal tlett ijiem biss, bejn l-Erbgħa tat-Tniebri u l-Ġimgħa l-Kbira.
Għal din l-esebizzjoni tal-Mejda tal-Appostli, wieħed se jkun qed jara mal-200 platt magħmul minn diversi tipi ta’ għaġin, ross, għads u ful. Storikament din ma tirrappreżentax il-Mejda tal-Appostli kif magħrufa fl-iskrittura, iżda l-iskop wara dan kien li, kull min jieħu sehem fil-ħasil tar-riġlejn nhar Ħamis ix-Xirka, kien jingħata sehem mill-għaġin u r-ross, li kien ikun qed jiġi esebit matul il-wirja.
Dan spjegah aħjar Dr Ivan Grixti, fejn magħna spjega l-istorja wara l-għażla tal-għaġin u r-ross, u saħaq li llum il-ġurnata, l-għaġin li jkun hemm jingħata donazzjoni lil xi għaqda filantropika, fejn din is-sena se jkunu qed jintbagħtu bħala donazzjoni lid-Dar tal-Providenza.
Qal, “Kif forsi ndunajt, il-wirja fiha nnifisha mhijiex replika tal-aħħar ċena li kellu Sidtna Ġesù Kristu bir-rikludi, imma hi bbażata fuq ross u għaġin u dan għax dejjem kien hemm skop soċjali warajha. Qabel ma twieldu s-servizzi soċjali f’pajjiżna, li kien jiġri hu li kien ikun hemm 13-il raġel meqjusa fqar mill-parroċċa, u wara li jieħdu sehem fiċ-ċeremonja ta’ ħasil ir-riġlejn nhar Ħamis ix-Xirka, kull wieħed kien jieħu s-sehem tiegħu mill-ikel li jżejjen il-mejda meta tispiċċa f’nhar il-Ġimgħa l-Kbira.”
Minkejja l-platti b’għaġin ikkulurit, li ilkoll għandhom sinifikat storiku, għax uħud jirrappreżentaw l-fratellanza li tmur lura mijiet ta’ snin, kull min se jżur din il-wirja se jkun qed jitpaxxa bil-pitturi u kwadri uniċi maħdumin, fosthom minn Mattia Preti, flimkien ma’ ventartal tal-fidda li nħadem fl-1766.
Biex jittella’ dan ix-xogħol kollu, il-ħidma tibda fir-Randan u bħalissa jieħdu sehem mal-madwar tmin membri biex jittella’ dan ix-xogħol kollu, bi tliet membri għandhom esperjenza ta’ outside catering.
Waqt iż-żjara li għamilna, Dr Grixti qasam magħna l-istorja wara din il-wirja, li tmur lura għal aktar minn 200 sena ilu.
Qal, “Il-wirja ilha għaddejja mill-1784, jiġifieri din hi l-240 edizzjoni, għajr għas-sentejn li ma ntramatx minħabba l-pandemija. Kif forsi anke nnotajt, l-Oratorju fih innifsu hu teżor kbir tal-arti Barokka; biżżejjed insemmu l-kwadru titulari li jappartjeni lil Mattia Preti li fih żewġ dettalji interessanti.”
Dr Grixti tenna b’appell għall-pubbliku biex iżuru din il-wirja ta’ valur storiku kbir fil-Belt Valletta.
Qal, “Jien nappella lil dawk li qed isegwu das-servizz biex jekk jogħġobhom iżuru, id-dħul huwa b’xejn, imma l-ispejjeż hemm qegħdin, u huma u ħerġin mill-Oratorju aħna nilqgħu kull offerta li jistgħu jagħmlu. Forsi nista’ nidentfika l-ħinijiet, għada Ħamis ix-Xirka terġa tiftaħ bejn is-7:30am u 12:00pm, filgħaxija niftħu fl-4:00 pm u nibqgħu għaddejin sa tard filgħaxija skont l-andament tan-nies li jkunu qed jagħmlu l-visti fil-Belt kapitali, u nhar il-Ġimgħa l-Kbira nerġgħu bejn id-9:00 am u 12:00, imbagħad bejn l-4:00 pm u s-7:00 pm meta l-wirja tagħlaq.”
