Vot b’saħħtu għall-Partit Laburista fit-8 ta’ Ġunju, huwa vot ta’ fiduċja ieħor biex inkomplu b’aktar kisbiet bis-saħħa tagħkom.
Dan kien il-messaġġ ewlieni li għadda l-Prim Ministru u Mexxej tal-Partit Laburista, Robert Abela, f’Mass Rally il-Ħadd filgħodu, f’Ta’ Farsina, f’Ħal Qormi.
Dr Abela semma diversi sfidi li sab wiċċu magħhom kemm ilu fit-tmun tal-pajjiż, fejn dejjem talab il-fiduċja tal-poplu li sellifielu u l-Gvern irreċiproka b’ħidma sfieqa.
Għalhekk stqarr kif se jmur quddiem il-poplu bl-istess mod, fejn sostna li quddiem l-isfidi li jista’ jħabbat wiċċu magħhom pajjiżna, il-poplu jaf li Gvern Laburista se jkun tarka għalih.
“Jekk temmnu li rridu nkomplu f’din it-triq, jekk ma tridux li nieqfu f’nofs triq mela għandi bżonn bis-saħħa l-vot tagħkom b’saħħtu fit-8 ta’ Ġunju.”
il-Prim Ministru Robert Abela
Fil-lokalità fejn il-Prim Ministru qatta’ parti sostanzjali minn ħajtu, Robert Abela stqarr kif kien hawn li tgħallem ir-realtajiet tal-ħajja, minn fejn innota l-bżulija tal-poplu Malti biex jipprovdi futur aħjar lil uliedu u lil ulied uliedu.
“Hawnhekk tgħallimt ir-realtajiet tal-ħajja, il-bżulija ta’ ħaddiema fil-fran hawnhekk li ma jorqdux bil-lejl, il-ħaddiema liċenzjati tax-xatt, bħan-nannu li tant u tant batew iġorru x-xkejjer taz-zokkor fuq spallejhom, neżlin mill-bastimenti fuq il-fallakki meta makkinarju lanqas kien hawn.”
il-Prim Ministru Robert Abela
Dan is-sens ta’ bżulija għal ġejjieni aħjar, irid ikun rifless fil-ħidma li jwettaq il-Gvern.
Kien hawn li Dr Abela tkellem dwar numru sabiħ ta’ kisbiet li ħallew il-frott matul din il-ġimgħa. Fost l-oħrajn semma l-ftehim settorjali li ntlaħaq bejn il-Gvern u l-Unjin tal-Għalliema, l-MUT, li hu l-akbar wieħed tax-xorta tiegħu u se jwassal għal kundizzjonijiet tax-xogħol aħjar għall-edukaturi f’pajjiżna.
Semma wkoll l-implimentazzjoni tal-miżura li se tagħti elf u ħames mitt ewro lill-familji ta’ dawk l-istudenti li jkomplu bl-istudji tagħhom wara l-età obbligatorja filwaqt li tħabbar investiment fejn tidħol il-manifattura ta’ partijiet tat-turbini tar-riħ li se jwassal għal aktar karrieri ta’ kwalità.
Dan kollu kien ikkonfermat biċ-ċertifikat mogħti mill-aġenzija ta’ kreditu internazzjonali Moody’s, li tat rating b’saħħtu għall-ekonomija ta’ pajjiżna u statistika li wriet l-importanza tal-iskema ‘Stabbiltà’.
Dr Abela temm jirrimarka kif fil-ġejjieni, il-Gvern se jintensifika l-ħidma tiegħu b’għadd ta’ miżuri bħal tnaqqis fit-taxxa, pensjonijiet aqwa, aktar spazji miftuħa, u sptarijiet u skejjel ġodda.
“Jekk din hija l-Malta u l-Għawdex li tridu, fit-8 ta’ Ġunju erġgħu kunu miegħi, erġgħu isilfuni l-fiduċja u s-saħħa tagħkom biex inkompli nmexxi u nsaħħaħ lil pajjiżna. Jien nemmen fikom, is-saħħa f’idejkom, is-saħħa lill-Qriema, is-saħħa lill-Għawdxin u s-saħħa lill-Maltin.”
il-Prim Ministru Robert Abela
