Kienu t-teams ta’ Falcons u Paola Executive Security li rnexxilhom jagħmluha għall-finali tat-Tazza Nazzjonali. Dan wara li l-Ħadd fil-kumpless Sportiv tal-Kottonera saru ż-żewġ semi finali ta’ din il-kompetizzjoni prestiġjuża organizzata mill-Assoċjazzjoni Maltija tal-Volleyball. Dawn il-partiti kienu verament bilanċjati kif jindikaw ir-riżultati.
Fl-ewwel semifinali, il-leaders attwali tal-kampjonat Super League, Falcons eliminaw liċ-champions Swieqi Phoenix Nium bl-iskor ta’ 3-2. Falcons immexxija minn Jacques Seifert tilfu l-ewwel set kontra t-team immexxi minn Leonard Zammit Munro 18-25. Madankollu rebħu t-tieni wieħed 25-18 u tilfu t-tielet set 18-25. Falcons irreaġixxew u rebħu l-aħħar żewġ sets 25-23 u 15-10.
Min naħa l-oħra fit-tieni semifinali, it-team mill-Ewwel Diviżjoni u leaders ta’ dan il-kampjonat, Paola Executive Security eliminaw lil Birkirkara mill-kampjonat Super League wkoll wara li rebħulhom 3-2, logħba li ħadet tliet siegħat. Paola, immexxija minn Michael Magro u assistit minn Antonio Borg, bdew fuq nota negattiva u tilfu l-ewwel set 25-13. Maħsuda mill-eżitu tal-ewwel set, it-team Pawlist irreaġixxa sew u rebaħ it-tieni wieħed 16-25. Madankollu tilef it-tielet wieħed kontra t-team immexxi minn Stefan Decelis 25-17. Paola Executive Security għaddew għall-finali wara li rebħu l-aħħar żewġ sets 23-25 u 11-15.
Is-sensiela tal-partiti finali mit-Tazza Nazzjonali jintlgħabu fil-bidu tax-xahar id-dieħel.
Ir-riżultati kollha:
Tazza Nazzjonali
Falcons 3 Swieqi Phoenix Nium 2
Birkirkara 2 Paola Executive security 3
Under 19
Paola 3 Flyers 2
Under 17
Swieqi Phoenix Volley Maniacs 0 Birkirkara ThunderSpikes 3
Birkirkara Storms 0 Swieqi block N roll 3
Under 15
Falcons 1 Paola Maypole 3
Birkirkara 3 Depiro 1
