L-imsieħba soċjali kollha ta’ pajjiżna laqgħu b’mod pożittiv u kellhom biss kliem ta’ tifħir għall-Viżjoni Malta 2050, li għandha 90 mira b’iżjed minn 1,800 miżura b’kollox f’diversi oqsma, bil-maġġoranza tagħhom li jridu jintlaħqu sa għaxar snin oħra.
Viżjoni fit-tul, li anke ġiet deskritta mill-Prim Ministru Robert Abela, waqt it-tnedija tagħha għall-konsultazzjoni pubblika nhar it-Tnejn, bħala eżerċizzju uniku li se jħalli frott enormi.
F’kummenti wara t-tnedija, Marthese Portelli u William Spiteri Bailey, il-Kap Eżekuttiv u l-President tal-Kamra tal-Kummerċ rispettivament, innotaw kif wara dan kollu kien hemm konsultazzjoni wiesa’, inkluż mal-imsieħba soċjali fil-Kunsill Malti għall-Iżvilupp Ekonomiku u Soċjali, l-MCESD.
“Innotajna wkoll li numru ta’ suġġerimenti li ressqet il-Kamra tal-Kummerċ ġew integrati wkoll. Eżempju aħna ilna għal dawn id-diversi snin ninsistu dwar l-importanza li s-suċċess tal-pajjiż ma jitkejjilx biss bil-GDP tal-pajjiż, iżda wkoll lejn il-kwalità tal-ħajja.”
Marhtese Portelli, Kap Eżekuttiv, Kamra tal-Kumerċ
“Viżjoni tajba għax mhux biss ekonomika, iżda viżjoni globali u f’dak l-ambitù, aħna l-importanti hu li meta niġu biex inħarsu lejn kif dawn jiġu mħaddmin, fir-realtà nkunu qed nassiguraw li qegħdin jintlaħqu.”
William Spiteri Bailey, President, Kamra tal-Kummerċ
Iż-żewġ Kapijiet Eżekuttivi Għawdxin, Joe Muscat mill-Assoċjazzjoni Għawdxija għat-Turiżmu u Daniel Borg mill-Kamra tal-Kummerċ t’Għawdex, tennew l-impatt ferm pożittiv li din il-viżjoni se tħalli fuq il-gżira u r-residenti tagħha.
“Hi bbażata fuq il-kwalità tal-ħajja taċ-ċittadin. Allura din hija viżjoni importanti ħafna u aħna wkoll, bħala Għawdxin, il-gżira tiffoka f’din il-viżjoni li tħares lejn il-gżira li tista’ tagħti kontribut ekonomiku u anke kontribut fit-titjib tal-kwalità tal-ħajja taċ-ċittadin.”
Joe Muscatm Kap Eżekuttiv, GTA
“Nemmnu fin-neutrality objective, nemmnu fi żvilupp ekonomiku sostenibbli u, f’dan il-każ, nemmnu f’Għawdex, speċjalment id-diversifikazzjoni, u anke aħna bħala Chamber qed naraw li Għawdex jimxi f’setturi oħrajn, bħad-diġitalizazzjoni u l-green economy, li jkollhom impatt inqas fuq l-ambjent.”
Daniel Borg, Kap Eżekuttiv, GBC
Josef Bugeja, Segretarju Ġenerali tal-General Workers’ Union, l-akbar unjin tal-ħaddiema f’pajjiżna, għamel aċċenn dwar kif il-viżjoni tħares ukoll lejn il-kwalità tal-ħajja.
“Aħna bħala sħab soċjali mal-Gvern naħdmu biex naspiraw li jkollna soċjetà fil-futur li tkun aħjar minn dik li sibna aħna. Din il-viżjoni qed tagħtini l-istilla biex aħna nimxu f’dan il-pjan kollu.”
Josef Bugeja, Segretarju Ġenerali, GWU
Sadanittant fi stqarrija l-Kamra tan-Negozji Żgħar u Medji laqgħet ukoll din il-viżjoni, li ddeskrivietha bħala l-pass ‘il quddiem sabiex pajjiżna jimxi għal ekonomija sostenibbli.
Aqra Aktar:
