Bħal lum tliet snin ġie approvat it-tielet qari ta’ liġi li bidlet il-ħajja ta’ bosta nies – il-liġi tal-Unjoni Ċivili.
Dwar dan one.com.mt tkellem ma’ Cyrus Engerer li kien wieħed mill-attivisti li stinka ħafna biex din il-liġi tidħol fis-seħħ. Huwa stqarr magħna li permezz tal-liġijiet li daħħal il-Gvern fl-aħħar erba’ snin irnexxielna nneħħu ħafna mill-istigma li kienet teżisti fil-konfront tal-komunità LGBTIQ.
“Illum għal ħafna hu normali li koppja tal-istess sess tingħaqad f’Unjoni Ċivili jew żwieġ. Intwera ukoll, x’ambjent tajjeb ta’ familja jista’ jingħata lil dawk it-tfal li sfortunatament twieldu f’nuqqas tiegħu,” spjega Engerer.
Huwa għamel referenza għall-ewwel adozzjoni f’pajjiżna minn koppja gay u qal li din il-koppja qed iservi ta’ eżempju. “Eżempju li żgur kulħadd inġibed warajh kien dak taċ-ċkejken Ben. Bħalu hemm oħrajn li issa għandhom ġenituri u familja biex imexxuhom ‘il quddiem.” Cyrus qalilna li għalhekk issa wasal iż-żmien li koppji gay ikollha aċċess għal metodi ta’ riproduzzjoni artiċifiċjali, bħall-IVF u oħrajn.
Minkejja li dan kien żvilupp importanti ħafna f’pajjiżna, żvilupp li llum il-ġurnata qed iservi ta’ eżempju għal pajjiżi oħra, Cyrus jemmen li d-diskriminazzjoni ma tispiċċa qatt.
“Irridu nkomplu naħdmu, speċjalment fil-qasam ta’ persuni transgender. Filwaqt li l-għandna l-aqwa liġi fid-dinja, it-trawma u l-abbuż li għaddew minnu bosta persuni transgender, żgur li taffetwalhom ħajjithom kollha. Illum inserħu rasna li t-tfal li huma transgender f’pajjiżna se jikbru f’ambjent favurihom.”
Huwa kellu kliem ta’ tifħir għal Gvern ta’ Malta li b’ħidma mal-Ministeru għall-libertajiet ċivili wera kuraġġ li jdaħħal liġijiet li għal ta’ qabel jidher li ma kienux “worth it.”
Fil-kummenti tiegħu Cyrus tkellem dwar il-pass li jmiss. Jemmen li wasal iż-żmien li titneħħa l-istigma fuq persuni pożittivi għall-HIV. “Nemmen li rridu nbidlu mill-qiegħ il-metodi użati fil-GU clinic u jeħtieġ li nżidedu l-għarfien fuq ħajja sesswali sana. Konvint mill-intenzjonijiet tajba tal-ħaddiema kollha ta’ dan il-clinic, iżda wasal iż-żmien li nimxu ‘l quddiem u nużaw metodi aktar moderni u miftuħin.
Għalhekk appella għal aktar ħidma li mhux biss tassigura li jitnaqqas il-mard relatat mas-sess iżda li naraw lil dawk il-persuni pożittivi għall-HIV jsibu l-bibien tas-soċjetà miftuħa sabiex ikomplu jikkontribwixxu.
“F’erba’ snin wasalna s’hawn. Tliet snin ilu, b’entużjażmu ċċelebrajna flimkien fil-Belt. Bid-determinazzjoni li għandu l-Gvern għall-ugwaljanza, konvint li fis-snin li ġejjin, se jitkomplew jittieħdu l-miżuri neċċessarji biex ikollna soċjetà miftuħa li jgawdi minnha kulħadd,” temm jgħid Cyrus Engerer.
