Għaxart ijiem ilu fil-Buskett, faqqsu tliet bajdiet ta’ frieħ tal-barbaġann wara jiem ta’ stennija mill-omm u l-membri tal-Federazzjoni Kaċċaturi Nassaba u Konservazzjonisti, l-FKNK.
Il-wasla tal-frieħ intlaqgħet b’idejn miftuħa mill-membri u anki l-omm li ndukrathom lejl u nhar biex jikbru b’saħħithom.
Fil-fatt, hekk kif crew ta’ dan l-istazzjon resaq qrib l-omm u l-frieħ tagħha b’tentattiv li jikseb filmat ta’ dawn il-ġmiel tan-natura, l-omm kienet b’seba’ għajnejn fuqhom biex ma jersqux wisq viċin tagħhom .
Dawn il-frieħ huma parti mill-proġett ta’ konservazzjoni tal-FKNK, li permezz tiegħu qegħdin jintroduċu l-barbaġann lura fl-ambjent Malti.
Il-President tal-FKNK Lucas Micallef spjegalna, “Dis-sena jidher b’mod prematur ħafna li ħa jkollna sena, waħda mill-isbaħ. Qed ngħidu dan għaliex il-barbaġann li għandna fil-faċilità fejn jitnisslu bdew diġà jnisslu l-frieħ. Fil-fatt, għandna bejta u wkoll illum rajna tlett ifrieħ, immarkajnihom skont kif titlob il-liġi wkoll tal-ambjent u qed inħarsu ’l quddiem biex ’il quddiem jintelqu fis-selvaġġ u jkomplu jkattru mal-popolazzjoni selvaġġa li tlaqna proprju ftit tax-xhur ilu.”
Ftit tal-ġimgħat ilu, l-FKNK ħelset numru ta’ barbaġanni u dawn iċ-ċkejknin se jingħaqdu magħhom meta jkunu lesti li jfendu għal rashom.
Micallef stqarr, “Aktar tard din is-sena ħa nħarsu biex uħud mill-frieħ nintroduċuhom postijiet oħra semi-urbani bħal Kemmuna u anki l-Mellieħa biex b’hekk kemm jista’ jkun, inkomplu nkabbru aktar il-popolazzjoni li nħaddnu fil-gżejjer Maltin.”
Żmien ilu l-barbaġann kien parti integrali mill-ekosistema Maltija iżda matul is-snin il-popolazzjoni ta’ din l-ispeċi naqset. Għaldaqstant, Micallef spjegalna li ekosistema b’saħħitha tirrikjedi l-preżenza akbar tal-barbaġann Malti.
Hu qalilna, “Il-Barbaġann bħala speċi huwa ferm importanti, nafu li kien parti miċ-ċiklu, parti mill-bijodiversità li kellna fil-gżejjer Maltin. Huwa importanti li nerġgħu naraw li dak li naqas jerġa’ jkun fiċ-ċikli biex b’hekk il-bijodiversità żżomm bilanċ u tkun proprja ekosistema b’saħħitha kif kulħadd jixtieqha.”
Fil-ġimgħat li ġejjin, il-FKNK mistennija terġa’ tilqa’ fi ħdanha l-ħajja permezz ta’ frieħ oħra hekk kif barbaġann minnhom biedet tmien bajdiet oħra.
