Kien dan il-messaġġ li ħareġ, meta riċentement il-Kunsill tat-Tfal u l-Kunsill taż-Żgħażagħ ffaċilitati mill-Fondazzjoni tal-President għall-Ġid tas-Soċjetà, iddiskutew il-parteċipazzjoni tat-tfal fil-komunikazzjoni politika. Il-membri tal-Kunsill tat-Tfal u tal-Kunsill taż-Żgħażagħ komplew biex jgħidu:“Isimgħu leħinna u x’għandna xi ngħidu. Aħna t-tfal normalment niġu użati fil-kampanji elettorali mingħajr ma’ ngħidu tagħna.”
Waqt diskors qasir li għamlet waqt ċerimonja biex jiġi mfakkar il-100 Anniversarju mit-twaqqif tal-1st Cospicua Scout Group, il-President ta’ Malta Marie-Louise Coleiro Preca, appellat lill-partiti politiċi biex f’dan il-mument ta’ kampanja elettorali, t-tfal ma’ jintużawx mingħajr il-kunsens tagħhom. Hija qalet li “jekk inħarsu d-drittijiet tat-tfal bis-serjetà, il-kunsens tal-ġenituri biss mhuwiex biżżejjed.” Il-President qalet li t-tfal għandhom id-dritt, bil-konvenzjoni, li jinstemgħu u għandhom jkunu kkonsultati.
“Inkompli nħeġġeġ lill-Kummissarju tat-Tfal, biex tkompli tiżviluppa standards ċari dwar il-parteċipazzjoni tat-tfal fil-komunikazzjoni politika,” saħqet il-President.
Il-President ħeġġet lill-Moviment tal-Iscouts biex ikompli jaħdem ħalli lit-tfal Maltin jgħinuhom jifhmu x’inhuma d-drittijiet u r-responsabilitajiet tagħhom, ħalli jgħinuhom jiżviluppaw, biex jsiru attivisti tal-bidla, attivisti tal-paċi, attivisti tal-ġid, sabiex għada pitgħada, jkunu l-mexxejja responsabbli tagħna.
Hija awgurat lill-1st Cospicua Scout Group tal-ħidma kbira li wettqu u għadhom iwettqu b’risq it-tfal tal-Kottonera u tal-madwar, filwaqt li qalet li x-xogħol tal-Moviment tal-Iscouts f’Malta, huwa xogħol imprezzabbli, għaliex, tul is-snin, dan il-moviment ħadem mill-qrib ma’ mijiet kbar ta’ tfal li lkoll ġew mgħejuna biex jiżviluppaw il-ħiliet u abbiltajiet soċjali tagħhom, biex miċ-ċokon jkabbru s-sens ta’ fraternità, is-sens ta’ team, ibbażat fuq rispett u d-dixxiplina tant meħtieġa biex isiru rġiel u nisa, u mexxejja ta’ għada.
“Dan il-ġid soċjali huwa bla kejl u għalhekk irrid nirringrazzja lill-leaders kollha matul dan il-mitt sena tal-kontribut soċjali bla qies li taw lill-komunità Bormliża, iżda wkoll lil Malta tagħna, bil-ħolqien ta’ opportunitajiet ta’ edukazzjoni mhux formali,” qalet il-President.
Fl-aħħarnett, il-President Coleiro Preca tenniet li r-relevanza tal-Moviment tal-Iscouts, ma tintilef qatt, “anzi nistgħu ngħidu li l-valuri tal-filosofija ta’ dan il-Moviment tal-Iscouts, llum huma saħansitra rikonoxxuti anke permezz tal-Aġenda 2030 tal-Ġnus Magħquda u l-Miri għall-Iżvilupp Sostenibbli”, fejn fost l-aktar valuri li joħorġu fuq quddiem, huma l-ħbiberija, il-kuraġġ, ir-rispett, l-inklużjoni, s-solidarjetà, u l-parteċipazzjoni tat-tfal. Il-President Coleiro Preca nkoraġġiet lill-Moviment tal-Iscouts biex jagħmel tiegħu dawn il-miri għall-iżvilupp sostenibbli, ħalli l-istess Moviment jkun qiegħed jikkontribwixxi għall-mixja ’l quddiem, li d-dinja teħtieġ tagħmel.
