“Tul dawn l-aħħar erba’ snin ta’ Gvern Laburista, in-Nofsinhar ta’ Malta reġa ħa r-ruħ.”
Qal dan il-Prim Ministru Joseph Muscat waqt il-programm Pjazza fi Pjazza minn taħt it-tinda fil-lokalità f’Birżebbuġa. Muscat beda d-diskors tiegħu billi fakkar fil-ħidma ta’ Gvern Laburista fin-naħa tan-Nofsinhar ta’ Malta fejn fosthom fil-lokalità ta’ Birżebbuġa f’dawn l-aħħar erba’ snin ngħalqu t-tankijiet taż-żejt, sar pitch, qed jinħoloq grawnd, tneħħa t-tniġġiż u bosta familji bħalissa qed igawdu mit-tneħħija taż-żjut tal- Heavy Fue Oil fid-Delimara.
Il-Prim Ministru spjega dwar kif “il-kaos li jista’ jkun hemm kemm-il darba ma noħorġux nivvutaw għall-Partit Laburista hu reali, dan ifisser li jerġgħu jirrenjaw l-istess persuni li ħolqu l-problemi. Min ħoloq il-problemi ftit li xejn se jsib solluzzjoni.”
Muscat sostna “għamilna l-pożizzjoni tagħna ċara li rridu li l-freeport jaħdem imma ma rriduhx li jibla lin-nies.” Spjega kif lil’hinn mill-punti kollha li jissemmew is-soltu, f’kull lokalità u f’kull familja wieħed se jsib affarijiet li jolqtu lil kull familja u kull lokalità b’mod partikolari.
Il-Prim Ministru spjega kif il-Partit Laburista mhux qed jipprova jbeżża’ lill-poplu iżda qed jgħid lin-nies x’hemm li nistaw nirriskjaw u kif ukoll l-opportunitajiet. Hu qal li jemmen bis-saħħa li diment li l-Partit Laburista jerġa’ jingħata l-fiduċja, fis-snin li ġejjin se jkun hemm ħafna aktar ġid fil-pajjiż – aktar investiment, aktar xogħlijiet u żieda fit-turiżmu.
Muscat semma kif tul dawn l-aħħar erba’ snin in-Nofsinhar ta’ Malta ħa r-ruħ fejn qal “u ngħidha bħala bniedem li ġej mit-Tramuntana. Nieħu pjaċir li f’dan il-pajjiż ma jkunx hawn qasma. Nieħu pjaċir meta jkellmuni nies minn naħa tal-Qajjenza, minn Marsaxlokk u minn Wied il-Għajn – li sa seba’ snin oħra se jiżżarma l-impjant tar-riċiklaġġ – li jgħiduli li fl-aħħar il-valur tal-propjetà tagħhom qed jitla’.” Semma wkoll kif dan il-Gvern se jkun qed jinsisti iktar biex jagħti l-aħħar tefa’ għal investiment f’lokalitajiet bħal Bormla, l-Isla u l-Kalkara.
Il-Prim Ministru sostna kif kull min illum tkellem waqt il-programm Pjazza fi Pjazza ta l-esperjenza personali tiegħu fuq l-affarijiet kbar li għamel dan il-Gvern li bihom biddlu l-pajjiż għall-aħjar. Minn affarijiet ta’ importanza bħat-trasformazzjoni tas-sistema tal-enerġija u t-tneħħija tat-tankijiet tal-gass, għal mod ta’ kif żdiedet il-paga minima, il-bidla fil-qasam finanzjarju u kif se jkompli jiżdied ix-xogħol u saħansitra fuq affarijiet li għandhom x’jaqsmu ma’ għajnuna fil-qasam tal-isport u kif ukoll ta’ persuni b’diżabbiltà.
L-appell speċifiku tal-Prim Ministru hu għal dawk kollha li vvutaw lil dan il-moviment għall-ewwel darba erba’ snin ilu, fejn qal “għamilna żballji, imma għamilna ħafna u ħafna tajjeb u bbażat fuq dan it-tajjeb irridu nkomplu nimxu ‘l quddiem. Nhar is-Sibt li ġej kulħadd għandu joħroġ jivvota. Għandi qalbi mimlija bil-kuraġġ li jekk inkomplu naħdmu, jekk inkunu flimkien, jekk kulħadd ikompli jinsisti biex kulħadd joħroġ jagħmel dmiru nhar is-Sibt li ġej – l-aqwa żmien ta’ pajjiżna għadu ġej.”
