Din il-ġimgħa l-President Donald Trump qal lill-ġurnalisti li f’xi ħin Elon Musk kien se jirritorna lura jmexxi l-kumpaniji tiegħu u li d-Dipartiment tal-Effiċjenza tal-Gvern se jiġi xolt.
Minkejja dan, il-White House għadha ma ħarġet l-ebda data ta’ meta se jkun qed jingħalaq id-DOGE, dipartiment intenzjonat li jkun wieħed temporanju sabiex titnaqqas in-nefqa tal-gvern. Iżda jidher li se jkun xolt qabel id-data antiċipata tal-4 ta’ Lulju 2026.
B’diversi impjegati diġà qed ikunu trasferiti f’diversi aġenziji federali oħra, Trump iddikjara li fix-xhur li ġejjin jaf ikun sodisfatt biżżejjed bl-ammont ta’ persuni jaħdmu fis-sod u li jridu jkunu parti mill-amministrazzjoni.
Musk kien impjegat bħala ħaddiem speċjali tal-gvern, li jfisser jista’ jaħdem biss għal 130 jum minn sena ta’ 365. Minkejja li ma ingħatatx data meta se jitlaq, fit-30 ta’ Mejju se jkun qed jagħlaq il-130 ġurnata mill-inawgurazzjoni ta’ Trump.
L-Erbgħa uffiċjali tal-White House qalu lill-ġurnal Politico li Musk kien se jitlaq dalwaqt, għad-differenza minn xahar ilu meta kienu qalu li se jsibu mezz kif Musk jista’ jaħdem aktar mil-limitu tal-130 jum.
Musk sofra disfatta nhar it-Tlieta f’Wisconsin meta l-votanti marru kontra l-għażla tiegħu għall-kandidat fil-Qorti Suprema minkejja li kien għamel aktar minn $21 miljun f’donazzjonijiet personali u anke attenda personalment waqt il-kampanja.
Iżda wkoll il-biljunarju għandu aktar problemi hekk kif Tesla, il-kumpanija tiegħu li timmanifattura vetturi tal-elettriku, irreġistrat nuqqas ta’ 13% fil-bejgħ matul l-ewwel tliet xhur ta’ din is-sena.
