Malli tasal quddiem din id-dar, tinnota atmosfera sabiħa u fl-istess ħin tal-biża’. Żorna d-dar tal-familja Agius fl-Imtarfa, li għandhom għal qalbhom it-tiżjin għal kull okkażjoni. Ma jistax jonqos li għall-Halloween jarmaw id-daħla ta’ darhom ukoll.
Għal dawn l-aħħar tlettax-il sena, ramaw bi ħġarhom biex jiċċelebraw għal din il-festa li kull ma jmur qed issir aktar popolari f’pajjiżna.
Ħafna mit-tiżjin fid-daħla tad-dar għamlitu Doreen Aguis b’idejha.
Minn brimb iswed kbir jiċċaqlaq ma’ kull żiffa riħ mal-ħitan tad-dar, għal dellijiet, kpiepel imsaħħra, iħirsa, ġrieden, qargħa aħmar, irjus ta’ skeletri u mummji, li jiddominaw kull rokna tal-parapett u d-daħla ta’ din id-dar, tistħajlek qed tara xi film tal-biża’ fl-aqwa tiegħu.
Kienu l-kuġini tal-familja Agius li jgħixu l-Amerika, fejn il-Halloween huwa ferm aktar iċċelebrat minn pajjiżna, li xprunaw u ħajruhom jibdew jarmaw. Fil-bidu bdew jibgħatulhom xi ornamenti li maż-żmien dejjem komplew ifornuhom fit-tiżjin ta’ din id-dar. Din is-sena saħansitra bagħtulhom skeletru ġgantesk biċċa biċċa. Tlabna lil Ernest jgħidilna kif spiċċa għandhom dan l-iskeletru għoli tnax-il pied.
Qal, “Kollox beda minn idea biex nagħti surprise birthday gift lill-mara. Ftit kont nobsor li hu daqshekk ikkumplikat biex iġġib xiħaġa mill-Amerika. Ilu ġej biċċa biċċa minn Mejju. L-aħħar biċċa waslet f’Settembru. Għall-grazzja t’Alla, wasal u wasal kollu qawwi u sħiħ.”
Staqsejnieh kif ġiet din in-namra li jarmaw għal kull festa u ċelebrazzjoni.
Qal, “Aħna minn dejjem, jien mit-tfulija kont narma ma’ tal-festa, ma’ tal-mużew, u meta jkollok dar u tkun sabiħa, tkun prominenti, u tarmaha għal kull okkażjoni, tgħinek biex fil-Milied, fil-Halloween, fil-Karnival dejjem nieħdu pjaċir narmaw speċjalment bid-dwal u l-kuluri u kulħadd jieħu pjaċir. L-ammont ta’ tfal li jiġu huwa xi ħaġa fenominali.”
Filwaqt li qalilna li ħafna tfal iżuru darhom għall-ħelu fit-Trick or treat, uriena filmat tal-Halloween tas-sena l-oħra, u qalilna x’jiġri fid-dar tagħhom nhar il-31 ta’ Ottubru.
Qal, “Ovvjament l-atmosfera tkun bil-lejl. Ikun hawn il-fog machine, jiġu ħafna tfal. Is-sena l-oħra ġew mitejn tifel u tifla mal-ġenituri tagħhom għal-ħelu. Il-mara tilbes il-kostumi, it-tfajla tat-tifel bil-kostum, kulħadd jgħin u l-ġirien jgħinu wkoll. Ikun hawn attivita sabiħa ħafna u nieħdu pjaċir nilqgħu lil kulħadd.”
