Il-purċissjoni tal-Bambin inbdiet mill-qaddis Malti San Ġorġ Preca. Kien hu li stinka biex tinxtered id-devozzjoni lejn il-misteru tal-Inkarnazzjoni u sa mill-1920 ħa ħsieb li f’kull raħal u belt lejlet il-Milied il-membri tal-M.U.S.E.U.M jorganizzaw “Dimostrazzjoni ad unur ta’ Ġesù Bambin” bil-parteċipazzjoni tat-tfal. L-ewwel Bambin li ntuża kien inġieb mill-knisja ta’ San Franġisk tal-Belt.
Din id-drawwa intgħoġbot u daħlet sew kemm f’Malta u anke f’Għawdex. Għalhekk lejlet il-Milied is-soċji tal-M.U.S.E.U.M jiġbru lit-tfal u dawn iġorru fuq spallejhom Bambin żgħir u joħorġu jduru mar-raħal bix-xemgħa, ikantaw innijiet tal-Milied. Din id-demostrazzjoni tferrxet mis-soċji tal-M.U.S.E.U.M f’diversi pajjiżi fejn is-soċjetà għandha membri tagħha jagħmlu xogħol missjunarju bħall-Awstralja, il-Kenja, il-Perù, u l-Albanija.
Marbuta mal-purċissjoni tal-Bambin hemm l-għanjiet Maltin tal-Milied u l-iktar waħda popolari bla dubju hija l-għanja “L-Benniena ta’ Ġesù Bambin” jew, kif inhi magħrufa, “Ninni La Tibkix Iżjed”. Din l-għanja inkitbet fl-1846 minn Patri Ġiżwita Indri Schembri. Meta kitibha kien l-Alġerija u kien kitibha għal dawk il-Maltin li kienu emigraw lejn l-Afrika ta’ Fuq.
“Ninni la tibkix iżjed
Ninni Ġesù Bambin
Ħallih għalina l-biki
Għax aħna midinbin”
Fl-aħħar nett, drawwa oħra li daħet sew fil-Milied hija l-prietka tat-tifel. Din id-drawwa bdiet fis-sena 1883 meta tfajjel bl-isem ta’ Ġorġ Sapiano għamel l-ewwel prietka tal-Milied fil-knisja parrokkjali ta’ Ħal Luqa. Ġeneralment jintgħażel tifel ta’ xi tmien snin li jkun kapaċi jimmemorizza l-kliem kollu tal-prietka u xi frażijiet bil-Latin ukoll, fosthom il-frażi tal-introduzzjoni: Annuntio Vobis Gaudium Magnum. F’xi rħula wara l-prietka t-tifel jingħata rigal żgħir bħala rikonoxximent għal dawk is-sigħat sħaħ ta’ studju!
Ħafna jibdew minn kmieni biex jippreparaw għal din il-festa. Ikun żball jekk nintilfu biss dwar il-preparamenti materjali u ninsew is-sinifikat reali ta’ din il-festa. Għalhekk għal din il-festa rridu nuru iktar imħabba, paċi u tolleranza ma’ kulħadd.
