Fejn qabel kont tidħol f’numru ta’ siti online biex torganizza btala, illum tista’ tidħol fuq sit wieħed u tinqeda mill-ewwel.
Mit-titjira sal-wasla tiegħek fil-lukanda, Air Malta Holidays hija l-pjattaforma ideali mħejjija apposta għall-aġenti tal-ivjaġġar biex tiffaċilitalhom xogħolhom.
Il-linja tal-ajru nazzjonali qalet li apparti l-effiċjenza li joffri, dan is-sit online jagħtik wkoll għażla ta’ akkomodazzjoni mill-aqwa lukandi u trasport mill-ajruport.
Iżda dan mhux biss, hekk kif dan is-sit joffri pakkett b’valur finanzjarju irħas milli kieku wieħed kellu jixtri t-titjiriet u l-akkomodazzjoni separatament.
L-Uffiċjal Kummerċjali Paul Sies spjega li dan is-servizz ser iservi ta’ pont għad-destinazzjoni finali mingħajr tidwir.
Huwa stqarr: “In the past, you would have to go to a travel agency, and sit at a desk and wait until they find a flight and a hotel. Actually, we do everything for the travel agency.”
Iċ-Chairman tal-Air Malta Charles Mangion spjega l-importanza li l-konsumatur ikun fiċ-ċentru ta’ dan il-proċess.” Huwa spjega: “Id-dynamic packaging għax dan hekk hu, sibna llum li l-passiġġiera u l-klijenti jitolbuh fejn ikollhom one stop shop biex huma jgħaqdu l-flight, il-lukanda, it-trasport, il-kiri tal-karozza, kollox flimkien.”
B’żewġ miljun konsumatur ta’ kull sena jagħżlu li jivjaġġaw mal-Air Malta, il-Ministru għall-Ekonomija Silvio Schembri stqarr li din l-inizjattiva kienet il-pass naturali li jmiss għall-kumpanija biex tiffaċilità l-ivjaġġar u fuq kollox tiġġenera dħul ġdid.
Il-Ministru Silvio Schembri sostna: “Din hija inizjattiva minn kullana ta’ inizjattivi li ħa nkunu qegħdin nieħdu bħala l-linja nazzjonali ta’ Malta l-Air Malta sabiex naraw kif ħa ndaħħlu revenue streams ġodda għall-kumpanija Air Malta. Il-linja nazzjonali ma rridux nibqgħu nħarsu lejha bħala attività tradizzjonali ta’ ġarr ta’ passiġġieri iżda ta’ opportunità ta’ sinerġiji ta’ inizjattivi oħra li jipproduċu dħul ieħor ġdid għall-Air Malta.”
Mil-lum ‘il quddiem aġenti lokali tal-ivjaġġar jistgħu jagħmlu użu minn dan is-servizz fuq is-sit airmaltaholidays.com
