19:15: Is-suspettat li kien qed jinżamm fil-kustodja tal-Pulizija inħeles mill-arrest, skond aħbarijiet rċenti li ġew żvelati fuq siti barranin. Dan wara li kien hemm nuqqas ta’ evidenza.
15:30: L-awtoritajiet Ġermanizi qalu li ma jistgħux ikunu ċerti dwar jekk il-persuna li bħalissa jinsab fil-kustodja tal-Pulizija hux il-moħħ ta’ wara l-attakk li seħħ f’Berlin.
“Irridu naħsbu fil-possibiltà li dan ir-raġel jaf ma jkunx hu li għamel dan l-attakk,” qal rappreżentant għall-Pulizija lill-ġurnalisti ta’ siti barranin.
Ir-raġel li qed jinżamm arrestat, li ċaħad l-akkużi li hu kien il-moħħ wara l-attakk, wasal il-Ġermanja mill-Pakistan lejn l-aħħar tas-sena 2015.
Hu ġie arrestat f’ġnien wara li allegatament ħarab minn fuq il-post.
Il-Kanċilleir Ġermaniż, Angela Merkel, f’diskors minn tagħha qalet li se tkun qed tikkastiga lil dawk li huma responsabbli għal dan l-attakk “bl-agħar mod li l-liġi tista’ tikkastiga.”
11:17: “Dan id-delitt kontra n-nies ċivili huwa xokkanti bl-akbar mod,” qal il-President Vladmir Putin lill-Kanċillier Ġermaniż Angela Merkel u lill-President Jpachim Gauch. Dan fid-dawl tal-attakk li seħħ f’Berlin fil-ħin li għadda.
Il-President Barack Obama kien wieħed minn bosta li kellem lill-Kanċillier dwar l-attakk fejn sorsi qrib il-Kanċillier qed jgħidu li Obama assiguraha li l-Istati Uniti se tkun ta’ appoġġ għall-Ġermanja waqt din l-investigazzjoni.
Tard filgħaxija l-‘White House’ f’messaġġ, ikkundannat l-att terroristiku.
10:00: Ir-raġel li kien qed isuq t-trakk li baqa’ dieħel fuq is-suq tal-Milied b’konsegwenza li qatel 12-il persuna, ġie identifikat bħala Naved B. Ġuvni ta’ 23 sena li hu refuġjat Pakistan.
Naved B, kien qed jgħix f’Flughafen Tempelhof, ajruport antik li kien ngħalaq u ġie mibdul f’kamp tar-refuġjati. Hu ġie arrestat dal-lejl wara li seħħ l-attakk.
Skond rapporti fuq midja barranija, il-ġuvni wasal il-Ġermanja sena ilu fejn irreġistra fil-Ġermanja fil-31 ta’ Diċembru fl-2015 f’Passau fil-Bavarja.
Aktar qabel: Tnax-il persuna nqatlu u tmienja u erbgħin persuna oħra ndarbu wara li trakk baqa’ dieħel f’folla ta’ nies f’suq tal-Milied fil-qalba ta’ Berlin.
Fl-aħħar sigħat, il-Ministru tal-Intern Ġermaniż qal li ħafna affarijiet qed jippuntaw lejn attakk li sar kien premeditat.
Dan filwaqt li l-Pulizija fuq Twitter qalu li x-xufier tat-trakk ġie arrestat u li l-passiġġier tal-istess trakk miet wara ġrieħi li ġarrab.
Is-suq jinsab f’Breitscheidplatz qrib Kurfuerstendamm, triq ewlenija magħrufa għax-xiri. Ilbieraħ onenews.com.mt tkellem ma’ Maltija li kienet f’Berlin, ġurnata qabel l-attakk.
Qed ikun irrapurtat li minn tal-inqas ħamsin persuna jinsabu rikoverati l-isptar, b’erbgħa minnhom isofru minn ġrieħi serji.
Is-sit soċjali Facebook waqqaf paġna ta’ “Safety Check” għan-nies f’Berlin sabiex jinfurmaw li jinsabu sikuri.
Sorsi tas-sigurtà qed jgħidu li x-xufier tat-trakk kien persuna li qed tfittex l-ażil mill-Afghanistan jew il-Pakistan u li wasal il-Ġermanja fi Frar li għadda.
Jidher li t-trakk, li kien mimli ħadid kien irreġistrat fil-Polonja u kien sejjer lura mill-Italja.
Il-Pulizija qalet li t-trakk insteraq fil-Polonja minn sit ta’ kostruzzjoni.
Kmieni dagħlodu, il-Prim Ministru ta’ Malta Joseph Muscat ħalla messaġġ fuq Twitter b’turija ta’ simpatija lejn in-nies ta’ Berlin u tal-Ġermanja.
Intant, dan il-każ tal-bieraħ fakkar fl-attakk li seħħ f’Jum il-Bastilja fi Franza, f’Nizza, nhar l-14 ta’ Lulju.
Dakinhar trakk baqa’ dieħel fin-nies u ħalla 86 persuna mejta. L-Istat Iżlamiku kien refa’ r-responsabbiltà għall-attakk.
