Lisa Loring, magħrufa l-aktar għall-karattru tagħha Wednesday Addams fl-ewwel adattament televiżiv ta’ The Addams Family, mietet fl-età ta’ 64 sena.
Bintha, Vanessa Foumberg, qalet lil The Hollywood Reporter li mietet kawża ta’ puplesija kkawżata minn pressjoni għolja.
“Hija mietet fil-paċi, biż-żewġt ibniet tagħha jżommulha idejha,” qalet Foumberg.
Is-serje The Addams Family kienet l-ewwel adattament tal-cartoons ta’ Charles Addams, li kienu ppublikati fin-New Yorker. Is-serje televiżiva damet għaddejja mill-1964 sal-1966 fuq l-istazzjon ABC.
Bħalissa l-karattru Wednesday b’mod partikolari reġa’ sar popolari grazzi għal Netflix, fejn qed tintwera serje bbażata fuq dan il-karattru, forma ta’ kummiedja mimlija avvenimenti sopranaturali.
Lisa Loring dehret ukoll fis-soap opera “As the World Turns” u fis-sitcom “The Pruitts of Southampton.”
