Tħabbret il-mewt ta’ Russi Taylor, il-vuċi tal-karattru tant famuż ta’ Disney – Minnie Mouse. Hi mietet fl-età ta’ 75 sena wara li kienet il-vuċi ta’ Minnie Mouse għal aktar minn 30 sena.
L-attriċi mietet f’Glendale f’Kalifornja fejn din l-aħbar tħabbret minn Walt Disney Company.
Mill-elf disa’ mija sitta u tmenin, Taylor ipprovdiet leħinha għal diversi serje, filmati u bosta aktar għal Disney b’mod partikolari fejn kien ikun hemm Minnie Mouse involuta.
Hi saħansitra tat sehemha fis-serje The Simpsons fosthom bħala l-karattru ta’ Martin, li kien il-ħabib ta’ Bart.
Fil-ħajja personali tagħha, Taylor mxiet fuq il-passi tal-karattru li kellha – Minnie Mouse. Dan hekk kif hi kienet iżżewġet lil Wayne Allwine – il-vuċi ta’ Mickey Mouse sakemm ħalla din id-dinja fl-2009.
