Propju fil-jum meta ħarġu żewġ surveys li żiedu l-pressjoni fuq Bernard Grech, missier il-partner ta’ Adrian Delia, Emmanuel J. Galea, għażel li jippublika artiklu fil-Malta Independent jikkritika lill-Kap tal-Partit Nazzjonalista.
Din hija t-tieni darba fi tliet xhur li Galea ħareġ qatta bla ħabel kontra Grech, meta proprju ftit wara r-risposta ta’ Bernard Grech għall-budget, Galea kien kiteb li l-Kap ma għandux viżjoni, ma kienx jaf jinterpreta statistika u li qed iwassal biex il-Partit jitlef il-kredibilità għax mank il-kontijiet tiegħu mhu kapaċi jippublika.
Issa Galea attakka d-diskors li għamel Bernard Grech fit-2 ta’ Frar meta mar Għawdex biex jipprova jgħid li għandu strateġija għal Għawdex. Skont l-artikolista meqjus qrib ħafna tad-deputat Alex Borg, dan id-diskors kien biss retorika vojta minn mexxej li ma jistax jispira. Huwa qal li Grech reġa’ offra ħafna wegħdi superfiċjali u bla pjan, filwaqt li m’offriex soluzzjonijiet. Tant li skont Galea, il-Kap Nazzjonalista wera biċ-ċar li ma jifhimx il-bżonnijiet ta’ Għawdex, imma ħsiebu biex joffri ideat mhux fattibbli u diskors vag biex jipprova jintogħġob.
Per eżempju staqsa kif Grech iwiegħed ir-raba u l-ħames vapur mingħajr ma jgħid kif dawn se jitħallsu jew fejn kieku se jsorġu. Qal li dan it-tip ta’ aġir huwa disservizz għall-Għawdxin, waqt li sostna li Grech mank kien kapaċi jħares lejn rapport li għamel Peter Agius fuq l-istess suġġett. Galea rrimarka wkoll li l-Kap Nazzjonalista reġa’ ma semmix is-servizz tal-fast ferry. Din hija ħaġa li kienet ħarġet anke fil-kampanja elettorali tal-2022 meta Grech ma riedx iwiegħed li dan is-servizz tant ta’ fejda għall-Għawdxin jitkompla.
L-artiklu ta’ Galea isostni li d-diskors tal-Kap reġa’ kien sett ta’ kritika riċiklata mingħajr ebda profondità ta’ ħsieb jew oriġinalità. Għalhekk huwa jgħid li Bernard Grech ma jistax jikkonvinċi lill-elettorat li jista’ jkun Prim Ministru. Dan ifisser, skont missier il-partner tal-ex kap Adrian Delia, li wasal iż-żmien li jinħatar Kap ġdid.
Hawnhekk Galea fetaħ attakk kontra d-deputat Għawdxi Chris Said. Huwa saqsa kif dan li tant ikkritika t-tmexxija ta’ Adrian Delia mhu jara xejn ħażin fl-inkompetenza u amministrazzjoni ħażina ta’ Bernard Grech. Huwa akkuża lil Said b’opportuniżmu politiku u double standards, u qal li jekk il-Partit Nazzjonalista mhux se jaffaċċja n-nuqqasijiet tat-tmexxija nterna mhux se jimxi ‘l quddiem. Dan għax Bernard Grech, jagħmel diskorsi kemm jagħmel diskorsi, qatt mhu se jikkonvinċi.
Mhux b’kumbinazzjoni ftit ħin wara fl-istess jum li ħareġ l-artiklu ta’ Galea, Alex Borg għażel li jtella’ artiklu f’ismu fuq il-portal Lovin Malta fejn qal li Għawdex ma’ għandux bżonn wegħdi vojta. Dan l-artiklu huwa kważi kopja perfetta ta’ dak ta’ Galea ħlief li fih ma hemmx attakk dirett fuq Bernard Grech. B’hekk hu ċar li Alex Borg kien qed juri biċ-ċar li huwa l-id wara l-attakk ta’ Emmanuel J Galea.
Sadanittant, din il-kitba wkoll sabet l-appoġġ u l-approvazzjoni tas-sieħba ta’ Adrian Delia.
