Il-Pulizija arrestat tliet żgħażagħ Belġjani u Olandiżi, li għandhom bejn il-21 u t-23 sena, b’allegat importazzjoni ta’ droga.
Mill-investigazzjonijiet li saru ġie identifikat pakkett li kien ġej minn barra minn Malta, b’ammont konsidervoli ta’ reżina tal-kannabis.
Fi stqarrija ntqal li lbieraħ, għall-ħabta ta’ nofsinhar, wieħed miż-żgħażagħ mar jiġbor il-pakkett minn Ħal-Luqa. Huwa ġie segwit sa residenza f’Ħaż-Żebbuġ u ġie arrestat.
Ftit ħin biss wara, iż-żewġ persuni l-oħra avviċinaw ir-residenza b’mutur sabiex jiġbru l-pakkett, li rriżulta li fih kien hemm man-nofs kilo reżina tal-kannabis, b’valur fis-suq ta’ madwar €5,000.
Malli ndunaw bil-Pulizija, iż-żewġ persuni ħarbu minn fuq il-post, wieħed bil-ġiri u l-ieħor bil-mutur. Il-persuna li ħarbet bil-ġiri nqabdet fil-viċinanzi ftit tal-ħin biss wara, waqt li l-ieħor ġie arrestat aktar tard f’residenza f’Ħal Qormi.
Saru aktar tfittxijiet fejn instabu madwar 50 boroż żgħar bil-ħaxixa tal-kannabis u boroż oħra li kien fihom il-ketemina u pilloli tal-MDMA, lesti biex jiġu ttraffikati.
Huma mistennija jitressqu l-Qorti għal ħabta tal-ħdax ta’ dalgħodu quddiem il-Maġistrat Caroline Farrugia Frendo.
