Santa Lucia kisbu tliet punti oħra ferm prezzjużi meta rnexxielhom jegħlbu lil Valletta b’goal f’kull taqsima biex fl-istess ħin għamlu s-sitwazzjoni tat-tim Belti aktar gravi fit-taqtiegħa kontra r-relegazzjoni.
Valletta kellhom l-aktar mil-logħob matul l-ewwel taqsima imma bdew isibuha diffiċli jippenetraw id-difiża ferm organizzata ta’ Santa Lucia tant li qatt ma mpenjaw serjament lill-goalkeeper Da Paz.
L-aktar li resqu qrib kien permezz ta’ żewg xuttijiet mill-bogħod. Fil-25 minuta xutt ta’ Fernando Omar Barrientos għadda ftit metri fuq il-lasta l-mimduda, waqt li fid-39 minuta kien Victor Ruiz li ttanta xortiħ b’xutt mill-bogħod li pero’ spiċċa wkoll ftit barra.
Santa Lucia skurjaw il-goal tal-vantaġġ minuta fuq il-ħin regolamentari qabel tmiem l-ewwel taqsima meta l-goalkeeper Belti Alessandro Guarnone salva imma ma żammx xutt ta’ Aleksa Mrdja biex mir-rebound Tatsuro Nagamatsu kien l-aktar veloċi biex jitfa’ l-ballun fix-xibka.
Anke fit-tieni taqsima, Valletta ħargu aktar determinati fit-tentattiv li jiskurjaw il-goal tad-draw u jsalvaw ir-riżultat, imma għal darb’oħra xejn ma kienu effettivi meta d-difiża ta’ Santa Lucia baqgħet tikkontrolla lill-attakkanti Beltin li ma setgħux isibu triq għall-goal.
Fid-49 minuta Valletta heddew bi cross tajjeb tas-sostitut Keyon Ewurum imma x-xutt ta’ Emmanuel David Garba ġie mblukkat f’corner.
Fis-67 minuta Paiber dendel freekick imma d-daqqa ta’ ras ta’ Federico Falcone ġie salvat tajjeb mill-goaler Da Paz.
Fit-72 minuta l-aħjar plejer Belti Victor Ruiz kellu xutt li għadda ftit għoli waqt li fil-85 minuta freekick mogħti minn Barrientos ġie kklerjat b’diffikulta’ mill-goaler Da Paz.
Valletta tefgħu kollox fuq l-attakk fl-aħħar ħinijiet imma fis-96 minuta kienu Santa Lucia li ssiġġillaw ir-rebħa meta Aleksa Mrdja qabad lid-difiża Beltija żbilanċjata u għeleb lill-goaler Guarnone.
Refereee: Fyodor Zammit
BOV Plejer tal-Logħba: Victor Luiz (Valletta FC)
