It-tabib u l-bankier Dr. Christian Pandolfino, ta’ tmienja u ħamsin sena, u s-sieħeb tiegħu Ivor Maciejowski, Ingliż ta’ tletin sena, inqatlu b’sitt tiri ta’ arma tan-nar f’dar lussuża f’Tas-Sliema.
Kien ftit qabel l-għaxra u nofs ta’ filgħaxija, meta nstemgħu xi tiri sparati mid-dar ta’ Pandolfino, fi Triq Locker kantuniera ma’ Triq Tony Nicholl.
ONE News kien fuq il-post ftit wara u beda jagħti l-ewwel dettalji tal-każ.
Fost oħrajn żvelajna li żewġt irġiel instabu mejta fid-dar, xi ħaġa li kienet ikkonfermata ftit wara mill-pulizija.
Il-pulizija spjegat kif fl-intrata tad-dar instab mejjet Christian Pandolfino.
Minn tfittxijiet li għamlu l-pulizija fid-dar, fis-sular ta’ fuq instab mejjet Ivor Maciejowski.
Fuq il-post inġabru n-nies, fosthom anki qraba u ħbieb tal-vittmi.
ONE News, li kien preżenti għal tul ta’ ħin fuq ix-xena tar-reat innota wkoll kif l-esperti forensiċi daħlu fid-dar biex jelevaw kull traċċa li tgħinhom fl-investigazzjoni.
Ftit qabel it-tlieta tal-Erbgħa filgħodu, iż-żewġ katavri ħarġu mid-dar bit-tbatija, anki minħabba t-taraġ li hemm fid-daħla tad-dar.
Il-katavri ddaħħlu fil-vann tal-mejtin tal-pulizija fejn ittieħdu għal aktar stħarriġ.
Intant matul il-jum, ONE News beda jiżvela dettalji esklussivi b’rabta ma’ dan l-omiċidju doppju.
Dan l-istazzjon żvela kif minn filmati elevati minn kameras tas-sigurtà tliet persuni dehru b’basket kbir f’idejhom fejn id-dar li fiha seħħ l-omiċidju doppju.
Huma dehru jirkbu f’karozza bajda li telqet minn fuq il-post.
Dan il-fatt ġie kkonfermat f’konferenza tal-aħbarijiet l-Erbgħa waranofsinhar indirizzata mill-kelliem għall-Korp tal-Pulizija, Brandon Pisani.
Is-Sur Pisani spjega kif it-tliet suspettati damu biss erba’ minuti fid-dar fejn seħħ id-delitt.
“Chris Pandolfino ħareġ mid-dar għal ħabta tas-7pm u mar lura d-dar għal ħabta tal-10pm. Ivor baqa’ d-dar. Fl-10:19pm dehru deħlin tliet persunu fir-residenza u erba’ minuti wara, fl-10:23pm l-istess persuni dehru ħerġin mir-residenza u jimxu lejn karozza ta’ kulur abjad u ħarbu minn fuq il-post b’din il-vettura.” Qal is-Sur Pisani.
Mill-investigazzjonijiet tal-pulizija sa issa għadu ma ġiex stabilit x’kien l-mottiv wara dan l-omiċidju doppju.
ONE News jinsab infurmat li l-pulizija mhux teskludi żewġ xenarji li jew xi ħadd prova jidħol fid-dar biex jisraq jew allegatament kienx hemm xi persuni ġewwa u seħħ xi argument li wassal għal dan il-qtil.
Il-pulizija, anki bl-għajnuna ta’ esperti qed tinvestiga jekk kienx hemm sgass.
Il-pulizija qalet li f’xi kmamar nstab xi taqlib, iżda mhux taqlib kbir.
Dan l-istazzjon żvela wkoll b’mod esklussiv li nsteraq d-deheb.
Sorsi qalu lil ONE News li n-nies li tkellmu mal-pulizija spjegaw kif Dr. Pandolfino kien jilbes fuqu ammont kbir ta’ deheb.
Dan filwaqt li s-sieħeb tiegħu, Ivor Maciejowski huwa kollezzjonist kbir tal-arti kontemporanja.
Dan jixduh ukoll ritratti fuq il-midja soċjali.
ONE News huwa infurmat ukoll li l-pulizija ma sabitx l-ammont kollu ta’ deheb li kellu Pandolfino.
Nifhmu li l-investigaturi qed jitkellmu mal-qraba u dawk viċin il-koppja li nqatlet biex jintefa’ aktar dawl dwar x’seta’ kien il-mottiv.
Iż-żewġ vittmi ma kinux magħrufa mal-pulizija, u ma rċivew l-ebda theddid.
Preżenti għall-konferenza tal-aħbarijiet kien hemm is-Supretendent mit-taqsima tar-reati maġġuri, Ramon Cassar u s-Supretendent mid-distrett Carmel Bartolo. Il-pulizija appellat għall-għajnuna tal-pubbliku.
Is-Sur Pisani qal, “Sabiex kull min ra xi ħaġa lbieraħ filgħaxija, jew inkella għandu xi informazzjoni dwar vettura simili ta’ kulur abjad li setgħet ħarbet minn duq il-post b’mod suspettuż, jikkunttatja lill-pulizija anki b’mod anonimu.”
Intant il-Ħamis se ssir l-awtopsja fuq iż-żewġ katavri fejn mistenni jkun stabbilit kif intlaqtu ż-żewġt irġiel.
B’rabta ma’ dan id-delitt kien hemm bosta li kienu jafu lill-koppja li wrew dispjaċir għall-mewt.
Pandolfino kien tabib li sar bankier snin ilu u għamel xi żmien barra minn Malta f’Londra fejn għamel suċċess fil-karriera tiegħu u mbagħad, madwar ħmistax-il sena ilu, ġie lura f’pajjiżna.
Il-Maġistrat Ian Farrugia qed imexxi l-inkjesta Maġisterjali.
