F’Malta ż-Żfin hu l-aktar arti pprattikata mill-Maltin, u t-teatru ta’ Dar il-Mediterran Għall-Konferenzi, li fih insibu l-akbar palk fuq ġewwa f’Malta, it-tradizzjoni se tkompli tissaħħaħ fit-tmiem din is-sena bi tlett iljieli importanti f’dak li jikkonċerna l-ballet u kull xorta oħra ta’ Żfin.
Fil-21 u 22 ta’ Dicembru se jkun hemm it-tieni edizzjoni tal-MCC Dance Showcase. Fl-ewwel jum xejn anqas minn 27 skola w kulleġġi li jgħallmu d-danza se jipparteċipaw fi programm ta’ żfin varjat, mill-klassiku sal-Modern,Spanjol, Hip Hop, Kontemporanju u stili differenti oħrajn. Minn tfal ta’ tnax-il sena sa studenti fl-aħħar sena tal-gradwazzjoni se jieħdu sehem bil-klassijiet tagħhom, u l-għalliema tagħhom. Din mhiex kompetezzjoni; imma ċelebrazzjoni tal-maġija u l-poeżija li taf trodd biss l-arti tad-danza.
Fit-tieni jum għaxar kumpaniji stabbiliti sew se jagħtu ir-rapprezentazzjoni tagħhom b’temi li għażlu u pperfezzjonaw huma stess, bis-solista Angelina Vlashinets, mit-Teatru Bolshoi. Iż-żeffiena sħaba huma wkoll ikoni tal-ballet Russu illi kif nafu jgawdi reputazzjoni kbira mad-dinja. Ser ikun hemm ukoll parteċipazzjoni tal-Kumpanija Nazzjonali taż-Żfin ŻfinMalta.Inizjattiva ġdida hija l-parteċipazzjoni tal-Orkestra Filarmonika ta’ Malta b’direzzjoni ta’ Michael Laus u kompożizzjonijiet fost l-oħrajn ta’ Charles Camilleri, Albert Garzia, Christopher Muscat u Alexey Shor. Ħaga xejn komuni li ż-żeffiena f’pajjiżna narawhom akkkumpanjati b’mużika live.
Fit-30 tax-xahar jaslu fostna truppa żeffiena miċ-Ċina, mill-provinċja ta’ Guangzhou, magħruf mad-dinja bħala ċentru ta’ kultura kbira. Il-programm tagħhom joffri kemm brani klassiċi bħal biċċiet minn Carmina Burana ta’ Karl Orff u Gizelle ta’ Adam Adolphe u oħrajn tradizzjonali ta’ pajjiżhom. Il-faxxinu tat-truppa jinsab fil-mod kif joħolqu fużjoni sħiħa ta’ stil Ewropej influwenzat mill-arti affaxxinanti tal-Orjent. Dawk li jsegwu id-Danza u l-arti marzjali orjentali se jkollhom esperjenza jassistu għall-rappreżentazzjoni unika li għandha għalfejn tibqa mnaqqxa fil-memorja.
Aktar informazzjoni tista tinkiseb mis-sit www.mcc.com.mt u biljetti jistgħu jinxtraw minn showshappening.com
