L-aġenzija Infrastructure Malta ħabbret li tlestew mad-disgħin fil-mija tax-xogħlijiet infrastrutturali fi Triq Sant Andrija fis-Swieqi.
Uffiċjali mill-istess Infrastructure Malta taw dettalji lil ONE News minn fuq il-post dwar ix-xogħlijiet li seħħew fil-jiem li għaddew u fuq il-ftuħ ta’ partijiet tal-proġett għas-sewwieqa, waqt li x-xogħlijiet issa jinsabu ffokati fin-naħa t’isfel tat-triq arterjali.
Ġie kkonfermat li ż-żewġ hairpin turns li kienu ppjanati fin-naħa tal-Luxol Grounds huma lesti u fformati, waqt li għaddej xogħol fuq hairpin turn oħra li hemm fil-parti ta’ Triq il-Professur Walter Ganado.
Mill-Ġimgħa filgħaxija, l-aċċess għal Pembroke għas-sewwieqa li jkunu ġejjin mill-Belt Valletta se jkun possibbli mill-hairpin turn lejn Triq Tobruk. L-aċċess minn Pembroke lejn is-Swieqi se jkun minn Triq Arnhem, bis-sewwieqa jaċċessaw l-hairpin turn l-oħra li tagħti aċċess lejn is-Swieqi jew High Ridge.
F’dan il-proġett ieħor maġġuri ta’ Infrastructure Malta tlesta wkoll ix-xogħol ta’ mogħdija ta’ servizzi, tqegħid ta’ pajpijiet tal-ilma u sistemi għall-ġbir tal-ilma tax-xita. Tlesta wkoll it-tqegħid ta’ walk-through culverts bil-għan li jintużaw mill-Enemalta biex tkompli tissaħħaħ id-distribuzzjoni tal-elettriku f’din iż-żona.
Fil-jiem li ġejjin se jitkompla x-xogħol t’asfalt, l-installazzjoni ta’ crash barriers bil-għan li tissaħħaħ is-sigurtà fit-triq u jibdew jintużaw is-sistemi ġodda ta’ traffic lights kemm għall-vetturi kif ukoll għal min juża t-triq bil-mixi jew ir-rota.
Preżenti fuq il-lant tax-xogħlijiet li għaddejjin f’Pembroke, il-Perit Walter Portelli spjegalna aktar fuq dak li qed isir attwalment.
“Il-proġett jikkonsisti fi tliet hairpin turns, tnejn in-naħa tal-Luxol Grounds u oħra n-naħa tal-entratura ta’ Pembroke biex ikun hemm flow aħjar ta’ traffiku u anke iżjed aċċessibiltà… Il-proġett kien jinkludi wkoll twessigħ biex aħna stajna ninkludu żewġ karreġġjati sejrin lejn id-direzzjoni ta’ San Pawl u żewġ karreġġjati oħrajn sejrin lejn il-Belt”.
Dan l-investiment, li se jnaqqas drastikament il-konġestjoni tat-traffiku frontali li kienet tikkawża t-triq, se jara wkoll it-tħawwil ta’ 258 siġra u arbuxell.
Dan il-proġett isegwi l-proġett ta’ roundabout ġdida f’salib it-toroq bejn Triq Sant Andrija u f’High Ridge fis-Swieqi. Dan se jseħħ bil-għan li jtejjeb l-aċċess għall-iskejjel u ż-żoni residenzjali fuq iż-żewġ naħat ta’ din it-triq ewlenija waqt li naqqas ir-riskji tal-aċċidenti tat-traffiku.
“Wara li se nkunu qed nagħtu dan l-asfalt il-ġdid fuq is-site li għadna kif wessajna, se nagħtu aċċess temporanju lejn Pembroke billi jkunu l-karozzi li ġejjin minn naħa tan-Nofsinhar, se jkunu jistgħu jduru mal-hairpins il-ġodda u jidħlu minn Triq Tobruk filwaqt li karozzi li ġejjin mit-Tramuntana jistgħu jduru minn ġewwa Triq Arnhem u jduru mal-hairpin u wkoll jidħlu s-Swieqi”.
Sussegwentement il-ħidma fl-inħawi se tidħol f’fażi oħra permezz ta’ sħubija mal-Awtorità tal-Ippjanar biex, minflok it-traffic lights fi Triq Reġjonali, qabel id-dħul lejn Paceville, jinbnew żewġ flyovers. Minn din iż-żona hu stmat li jgħaddu mal-1,600 vettura fis-siegħa.
Il-Kap Eżekuttiv ta’ Infrastructure Malta, Ivan Falzon, qal li, fil-ġimgħat li ġejjin, mistennija jibdew jinfetħu partijiet ġodda tal-proġett għas-sewwieqa, wara li fl-aħħar ġimgħat sar xogħol ta’ mogħdija ta’ servizzi biex jiffaċilitaw aħjar it-traffiku.
“Bażikament dan il-proġett hu parti ieħor minn kullana ta’ proġetti li bdew ftit ’il fuq minn fejn ninsabu f’High Ridge li, imbagħad, se jkompli għad-daħla tas-Swieqi u ta’ Paceville, it-traffic light junction ta’ Paceville. Dan hu parti minn mod ta’ kif norganizzaw it-traffiku li hu magħruf fiż-żoni u anke biex intejbu l-aċċessi għal Pembroke, għal lokalitajiet tas-Swieqi u Paceville stess”.
It-traffiku fid-direzzjoni minn San Pawl il-Baħar – Triq il-Kosta lejn il-Belt Valletta għalissa ser jibqa’ għaddej temporanjament minn Pembroke kif inhu għaddej bħalissa.
Dawn il-proġetti, bħal oħrajn, qed isiru b’konsultazzjoni mal-kunsilli lokali u għandhom l-għan li jżidu r-rotot diretti.
