Fil-Parlament kompliet tkun esposta l-ipokrezija tad-Deputati tal-Oppożizzjoni li ma jistgħux ikunu kredibbli fuq l-etika u l-korrettezza politika.
Din id-darba kien il-Ministru għall-Intern u s-Sigurtà Nazzjonali Byron Camilleri, li f’diskors fil-Parlament innota d-differenza bejn il-Gvern – li sa mill-elfejn u tlettax kien ta’ sostenn għall-poplu b’mod speċjali f’pandemija, u l-Oppożizzjoni, li d-Deputati tagħha ġmielhom jippontifikaw dwar l-etika u l-korrettezza imma ma mxewx bl-istess prinċipji meta huma stess kienu Ministri tal-Gvern. Fost dawn hemm Beppe Fenech Adami li lill-forzi tal-ordni kien ħallihom jittewbu.
Qal, “Fosthom għad hawn l-istess nies, quddiemi għadhom jiġu f’dan il-Parlament politiċi bħal Beppe Fenech Adami li meta kellu ċ-ċans ħalla l-forzi tal-ordni jittewbu. Lanqas biss ħallashom ta’ dak li kien dovut lilhom, aħseb u ara kemm tahom drittijiet aħjar. U llum f’din il-leġislatura minflok tgħallmu minn dawk l-iżbalji illi għamlu, minflok ħalla lill-kollegi tiegħu jippruvaw jitfgħu lis-suldati l-ħabs.”
Ma’ Beppe Fenech Adami, jingħaqad ukoll Jason Azzopardi li fil-gwardarobba m’għandux biss żjarat imħallsa sal-art imqaddsa iżda skandli ħoxnin bħal dak tal-art tal-Fekruna.
Qal, “Min irid jiġi hawnhekk f’dan il-Parlament u jitkellem fuq l-etika, xi ħadd bħall-politiku tal-bieraħ meta kien hu fil-Kabinett, meta f’kampanja elettorali jew inkella fi żmien li kien Segretarju Parlamentari jew fi żmien li kien Ministru, encroachments bl-addoċċ, rapporti tal-awditur, ħniżjirijiet bħal ħlas tal-Fekruna u llum jiġi hawnhekk u bil-wiċċ tost kollu jrid ipinġi lilu nnifsu bħala l-għażla jew l-alternattiva f’dan il-pajjiż. Xi ħadd jemmen li politiċi bħal dawn jistgħu jkunu l-alternattiva f’dan il-pajjiż.”
F’diskors li għamel fl-aġġornament tas-seduta parlamentari, il-Ministru Camilleri stqarr li llum dawn l-istess deputati qed jikkonfoffaw ma’ kull min b’xi mod jew ieħor jista’ jgħinhom ikissru u jagħmlu l-ħsara.
Qal, “Lesti li jikkonfoffaw ma’ kull min jaħsbu li jista’ jkisser lilna. Lesti jikkonfoffaw ma’ kull min għandu kwalunkwe interess basta mingħalihom li jaslu f’punt li jippruvaw jagħmlu xi tip ta’ ħsara anke jekk dik il-ħsara ssir fuq il-pajjiż. U ara xi ħadd ma jaħsibx illi ma nafux ma min qed jikkonfoffaw.”
