Matul dan tmiem il-gimgħa, il-pubbliku Malti huwa mistieden li jżur id-Dar tal-Providenza fis-Siġġiewi u jagħti palata finanzjarja ħalli l-ħolma li kellu Dun Mikiel Azzopardi tkompli tħalli l-frott b’risq ir-residenti tagħha.
One News iltaqa’ mal-parteċipanti protagonisti ta’ din il-maratona bit-tema ‘Sabiħ li tagħti’, li fl-eqqel tax-xemx kienu bi ħġarhom qed jissieltu f’kompetizzjonijiet tal-Volleyball.
Iltqajna ma’ wieħed mill-plejers Luke Attard, li qasam il-fliegu minn Għawdex għal din il-maratona u tlabnih jgħidilna x’kienet ir-raġuni li qed jieħu sehem fil-Maratona tal-volleyball għall-ewwel darba.
“Jien din hija l-ewwel darba, mal-ewwel tħossok home hawnhekk. Jiġifieri tkun familja waħda. Dejjem jaraw li ż-żgħażagħ bħala ħaġa kerha, din hija xi ħaġa li tgħin liż-żgħażagħ jagħmlu xi ħaġa ta’ ġid, kemm għalihom kif ukoll għall-oħrajn.”
Sibna lil Banda San Nikola tas-Siġġiewi tagħti sehemha f’din il-maratona wkoll, billi tferraħ lil dawk preżenti u lil plejers, b’marci brijużi li ċertament taffew ftit mis-sħana tax-xemx tiżreġ. Is-segretarju fi ħdan din l-għaqda muzikali Raymond Sant spjegalna is-sehem tal-banda San Nikola waqt din il-maratona.
“Din id-dar hawnhekk hija parti mill-komunità tagħna. Inħossu l-bżonn, mhux illum biss, is-sena kollha, aħna nagħmlu ħafna ġbir, allura okkażjoni bħal din ma nitilfuhiex. Bħala banda niġu nferrħu lil dawn l-isportivi f’din ix-xemx, u nagħtuhom ftit inkoraġġiment biex ikomplu jilħqu it-tir li għandhom biex jinġabru aktar fondi għal din id-dar.”
Tkellimna wkoll maċ-Ċhairman tal-Kumitat Organiżżattiv ta’ din il-Maratona Manoel Zammit li kellimna dwar l-ispettaklu fuq il-palk, li jservi ta’ ħarġa għall-familja kollha fejn saħansitra għamel l-appelli tiegħu wkoll.
“Kulħadd hemm, fiż-żona tal-ikel u tax-xorb, u fuq wara hemm ukoll iż-żona tat-tfal. B’hekk il-familja kollha, tista’, tista’, tieħu serata, u tagħmel donazzjoni, kemm hi, lid-dar tal-Providenza, li hija monument ħaj ta’ din id-dar li għandna d-dmir u r-responsabbiltà tagħna. Aħna nagħtu dik il-ħaġa żgħira biex inżommu din id-dar tibqa timxi.”
Mad-Direttur tad-Dar tal-Providenza ddiskutejna il-bżonn għaliex wieħed għandu jagħti sehmu f’din il-maratona permezz tal-għotjiet ġeneruzi mingħand il-Maltin.
“L-għan tagħha huwa li niġbru l-fondi li tant għanda bżonn id-Dar tal-Providenza biex tkompli toffri, servizzi residenzjali lil mija u ħmistax-il persuna li jgħixu fid-dar tagħna. Għalhekk nappella lill-poplu Malti u Għawdxi biex jerġa’ jkun ġeneruż mad-Dar tal-Providenza ħalli l-ħolma li kellu Dun Mikiel, aktar minn ħamsin sena ilu, tkompli ssir realtà.”
Il-maratona tigi fi tmiemha għada l-Ħadd f’nofsillejl u qed tkun qed tixxandar ukoll fuq l-istazzjon One.
