Tkellem l-eks President tal-Qorti

L-eks-President tal-Qorti  li llum huwa Imħallef għas-sentejn li ġejjin fil-Qorti Ewropea għad-Drittijiet tal-Bniedem,  ta intervista lit-Times of Malta.  Ħalli nagħmilha ċara.  Jien ma ddoqqli xejn li Imħallef ta’ Malta jagħti intervisti,  għax dak li għandu jgħid Imħallef jew Maġistrat huwa fis-sentenzi u mhux f’messaġġi  lill-istampa.

Hemm ħwejjeġ li naqbel miegħu u oħrajn li ma naqbilx.  L-agħar li kliemu jista’ jiġi interpretat li qed jagħmel ċensura fuq xi ħaġa tal-Gvern,  jew tal-amministrazzjoni.  Għalkemm għandu dritt tal-espressjoni però għandu wkoll il-kariga tiegħu li ġġib fuqu obbligi ta’ prudenza li joqgħod lura milli jħalli li jiħi interpretat.  Meta wkoll setgħet ma tkunx l-intenzjoni tiegħu.

Jien ma naqbilx miegħu kif ta interpretazzjoni għall-fatti li jistgħu jiġu pruvati.  Meta saret l-emenda li l-kumpilazzjoni kellha tintemm f’massimu ta’ tlett xhur,  kien hu li sab toqba minn fejn jgħaddi u jfettaq b’ħafna rinviji.  Dan meta kien avukat anzjan fl-uffiċċju tal-Avukat Ġenerali.   L-idea kienet li ma nħallux kumpilazzjoni tkarkar għall-eternità,  u skont min ikun l-avukat tal-Avukat Ġenerali jekk imurx ghal dak li hu sostanzjali jew joqgħod ifettaq u jirrakkma. 

Pereżempju kien hu li ta l-interpretazzjoni li hemm obbligu li persuna arrestata tinġieb fi żmien ħmistax  darba biss u wara qisu ma ġara xejn.  Issa jgħaddu sitt gimgħat u aktar u bniedem arrestat ma jitressaqx.   Issa dik il-parti tal-liġi kien daħħalha Profs Victor Borg Costanzi,  Alla jaħfirlu,  għax ma riedx li bniedem arrestat jintesa l-ħabs.

Imma dak li kien jinteressa lit-Times kien dwar l-investigazzjonijiet ta’ ċerti reati gravi.  Ma tridx tkun għaref ħafna biex tinduna li kienu qed jitkellmu fuq allegazzjonijiet ta’ reati li huma dwar persunaġġi fil-politika jew f’pożizzjoni għolja.  U  Dr Vincent De Gaetano tkellem fuq iż-żewg sistemi li jeżistu.  Dik Ingliża fejn il-pulizija għandha poter assolut fl-investigazzjoni,  u s-sistema kontinentali fejn ikun hemm Maġistrat li jinvestiga u jagħmilha ta’ prosekutur. L-Imħallef wera l-fehma li ħafna drabi ma jkunx hemm dik il-fiduċja għamja fil-Pulizija, ħalli ma ndurux mal-lewża,  u allura jaqbel li jkun hemm sistema oħra ta’ ġudikant. 

Tista’ tkun tajba u tista’ ma tkunx.  Fl-Italja pereżempju jkun hemm Maġistrati investigaturi li jkun l-ħin kollu jridu jidhru fuq it-television u l-midja,  u jfajru kif ġie ġie.  Protagoniżmu żejjed.  

Jien naf pereżempju li s-sistema Ingliża u s-sistema tagħna s’issa titħaddem b’suċċess kbir ġewwa Iżrael. Il-pulizija Iżraelita investigat u mexxiet fejn kellha tmexxi.

Però f’ġieħ is-sewwa,  tajjeb li niftakru ftit l-istorja riċenti.  Il-pulizija Maltija fl-investigazzjonijiet ta’ nies prominent ma baqgħetx lura.  Biżżejjed wieħed ifakkar fil-każijiet ta’  korruzzjoni fil-ġustizzja.  

U jekk l-Imħallef DeGaetano naturalment jiftakar,  kien minħabba f’hekk li hu laħaq malajr President tal-Qorti, għax verament ħadd ma jista’ jgħid li mhux bniedem onest u rett.  Imma ma jfissirx trid taqbel miegħu f’kollox.

U sfortunatament ħafna istituzzjonijiet tilfu l-fiduċja tan-nies,  għax kif qrajt dan l-aħħar,  l-aktar ħaġa diffiċli hi li tikseb il-fiduċja,  imma titlifha f’sekonda.