Il-Ministru għat-Turizmu Konrad Mizzi u l-Ministru għal Għawdex Justyne Caruana ħabbru l-iskema Enable Tourism. Din hija skema ġdida għall-istabbilimenti turistiċi Għawdxin li permezz tagħha se jkun jista’ jsir xogħol relatat mal-aċċessbilità ta’ siti turistiċi.
Il-Ministru Justyne Caruana fissret kif din l-iskema mħabbra fil-budget se tkun applikabbli għal żewġ kategoriji ta’ stabbilimenti—dawk ta’ inqas minn 40 sodda u dawk ta’ iktar minn 40. Permezz ta’ din l-iskema, u skont il-kriterji indikati, il-Ministeru għal Għawdex se jkun qed jiffinanzja 50% tal-ispiża li tkun eliġibbli taħt din l-iskema. Dan ifisser li l-gvern jifhem l-isfidi li għandu s-settur turistiku u l-ħtieġa li jinvesti biex jitjieb il-prodott hekk kif tiġi msaħħa u garantita l-aċċessibilità taħt il-policy accessible ‘Tourism for All’ li kienet ġiet imnedija mill-UNWTO hekk kif is-Segretarju Ġenerali kien fostna f’dawn l-aħħar ġranet.
“Is-settur turistiku f’Għawdex din is-sena laħaq livelli rekord u mistenni jkompli jikber u allura rridu naraw kif insostnuħ u nippreparawh għall-isfidi li ġejjin fil-futur”, qalet il-Ministru Caruana.
Il-Ministru Konrad Mizzi saħaq dwar l-impenn tal-gvern li jkompli jsaħħaħ it-turizmu f’Għawdex u jippromwovi lil Għawdex bħala destinazzjoni turistika distinta. Fakkar kif fil-ġranet li ġejjin huwa se jkun f’diversi fieri importanti fosthom f’Londra fejn se jkompli l-ħidma tiegħu b’risq il-promozzjoni ta’ Għawdex u biex Għawdex ikollu s-sehem tiegħu fis-suċċessi li qed jikseb pajjiżna f’dan is-settur.
Il-Ministru Mizzi qal li d-double digit increase fis-settur ta’ din is-sena juri kemm il-ħidma tal-gvern qed tħalli frott, u għalhekk il-ħtieġa ta’ investiment, titjib fl-infrastruttura, diversifikazzjoni, u permezz ta’ din l-iskema, se nagħmlu pass ieħor importanti.
Joe Muscat, is-CEO tal-Gozo Tourism Association, esprima s-sodisfazzjon tiegħu dwar din il-miżura li se tgħin sostanzjalment biex jintlaqgħu l-miri tal-aċċessbilità u t-titjib li huwa meħieġ għal dan l-għan. Huwa assigura li l-GTA se tkompli taħdem id f’id mal-gvern biex tinmbotta ‘l quddiem l-interessi tal-membri tagħha u tat-turiżmu f’Għawdex.
Għal aktar informazzjoni dwar din l-iskema tista’ tinkiseb minn fuq is sit http://www.mgoz.gov.mt(https://mgoz.gov.mt/en/Pages/eForms/EnableTourism.aspx) jew mill-mobile app ‘MyGozo’. L-applikazzjonijiet għandhom jiġu sottomessi sal-31 ta’ Jannar 2019
