Twaqqfet b’mod uffiċjali l-Climate Action Authority, is-CAA, li se tara li l-interessi ta’ pajjiżna f’dak li għandu x’jaqsam mat-tibdil fil-klima jkunu mħarsa u mismugħa. Il-Kap Eżekuttiv ta’ din l-awtorità se tkun l-Inġinier Abigail Cutajar.
Malta għal darb’oħra hija pijunier fost il-pajjiżi stati membri, hekk kif din hija l-ewwel awtorità ta’ dan it-tip fl-Unjoni Ewropea, u li ser tkun responsabbli li tikkordina u tissorvelja l-miżuri u r-regolamenti relatati mat-tibdil fil-klima ta’ pajjiżna.
Waqt it-tnedija, il-Prim Ministru Robert Abela saħaq kif it-tibdil fil-klima hija sfida ewlenija li rridu nindirizzawha bħala poplu magħqud, kulħadd flimkien – fil-livelli u fis-setturi kollha.
Fil-fatt tenna kif li ma nagħmlu xejn m’hiex għażla u għalhekk il-Gvern ser jagħmel il-parti tiegħu u se jagħmilha sew.
“Qegħdin hawn biex nimbuttaw politika li tħares il-futur, iżda anke ttejjeb il-ħajja tagħna llum il-ġurnata. Politika ambjentali u aktar ġusta.”
Dr Abela saħaq li din il-bidla jrid li n-nies iħossuha, u għalhekk għandhom huma wkoll ikunu parti minn dawn l-azzjonijiet xprunati favur il-klima; “Irrid li dan il-jum jibqa’ mfakkar għal bidu ta’ sforz nazzjonali favur il-ġenerazzjonijiet kollha ta’ pajjiżna.”
Spjega kif illum qed inwettqu ġustizzja ambjentli u enfasizza dwar ir-responsabbiltà kolletiva.
Min-naħa tagħha, il-Ministru għall-Ambjent Miriam Dalli tenniet kif dan kollu jimxi b’konformita mal-ħidma tal-Gvern favur l-ambjent u spjegat kif is-snin li ġejjin se jfissru għexieren ta’ proġetti oħra ambjentali; “Ma nistgħux inħarsu biss lejn illum, iżda għandna ir-responnsabbilita li nħarsu fit tul u nippjanaw għall-ġenerazzjonijiet ta’ warajna.”
Aktar qabel f’sessjoni ta’ informazzjoni mal-ġurnalisti, il-Ministru Dalli ħabbret kif l-aħħar stħarriġ mill-Kummissjoni Ewropea, wera li Malta għandha l-anqas emissjonijiet ras għal ras, meta mqabbel mal-pajjiżi kollha tal-Unjoni Ewropea.
Sabiex il-ħidma tal-Gvern timxi id f’id mal-ħidma tal-awtorità, numru ta’ Ministeri se jkollhom rappreżentanti, fost l-oħrajn is-Segretarji Permanenti, biex kull liġi jew miżuri li jiġu implimentati f’pajjiżna jkunu diskussi minn qabel mal-awtorità sabiex b’hekk jiġu rispettati il-miri ta’ Malta favur it-tibdil fil-klima.
Ġie spjegat kif l-Awtorità, ser tiżgura li l-effetti qed jiġu immonitorjati u l-istrateġiji ta’ Malta mħejjija biex jikkumbattu t-tibdil fil-klima jkunu effettivi u sostenibbli. Se tgħin ukoll biex pajjiżna jkun Carbon Neutral sal-2050.
Għal dan is-CAA hija se tgħin biex pajjiżna jaddatta l-liġijiet tal-Green Deal Ewropew u l-pakkett Fit-for-55 fuq livell nazzjonali li fix-xhur li ġejjin ser ikun qed jiġu aġġornati għal miri il-ġodda ta’ 2040 sa 2050, fejn il-komunikazzjoni u l-koordinazzjoni huma kruċjali biex jiġi żgurat li kulħadd, inkluż is-settur pubbliku, privat u l-individwi, jaħdmu flimkien biex jintlaħqu dawn il-miri.
L-Awtorità hija waħda regolatorja allura, wara li jkun ikkonfermat li jkun sar ksur ċar ta’ liġi, din tista’ timponi penali amministrattivi fuq individwi jew entitajiet. Se tkun responsabbli wkoll għall-koordinazzjoni tal-isforzi nazzjonali, tqajjem kuxjenza dwar il-klima, u timplimenta programmi ta’ mitigazzjoni u adattament biex pajjiżna jkompli jikkumbatti bis-serjetà l-kwistjoni tat-tibdil fil-klima.
