Ittellgħet ir-raba’ edizzjoni tal-konferenza annwali tal-Għaqdiet taż-Żgħażagħ bit-tema Sustaining Quality in Youth Organisations, organizzata minn Aġenzija Żgħażagħ.
Din il-konferenza rat is-sehem ta’ numru t’organizzazzjonijiet taż-żgħażagħ sabiex jiddiskutu kif jistgħu jkomplu jtejbu l-kwalità tal-ħidma tagħhom u jsaħħu l-impatt fuq il-komunità.
Din l-edizzjoni ttellgħet bħala parti miċ-ċelebrazzjonijiet tal-35 anniversarju ta’ Eurodesk – li jippromwovi opportunitajiet għal żgħażagħ u professjonisti fix-xogħol maż-żgħażagħ.
Is-Segretarju Parlamentari għaż-Żgħażagħ, ir-Riċerka u l-Innovazzjoni, Keith Azzopardi Tanti, tkellem dwar kif bħala Gvern, l-impenn lejn iż-żgħażagħ jibqa’ wieħed qawwi u ċar.
“Tkellimt fost l-oħrajn kif minn kwalità rridu nersqu lejn l-eċċellenza, u fost l-oħrajn, kif ħabbart, kelli l-opportunità ngħid li se nkunu qed nagħtu perjodu ta’ żmien partikolari lil dawn l-għaqdiet sabiex huma jressqu l-ideat partikolari, it-talbiet tagħhom, u l-proposti li l-Gvern jista’ jimplimenta bil-budget li ġej.”
Is-Segretarju Parlamentari Keith Azzopardi Tanti
Min-naħa tagħha, il-Kap Eżekuttiv ta’ Aġenzija Żgħażagħ, Miriam Theuma saħqet fuq ir-rwol importanti tal-organizzazzjonijiet fix-xogħol mal-adolexxenti u ż-żgħażagħ.
“Nisimgħu x’inhuma l-bżonnijiet tal-għaqdiet tagħhom – ħalli nużaw dawn il-bżonnijiet biex inkunu nistgħu nagħmlu miżuri tal-budget aħjar u b’hekk inkunu nistgħu nħajru aktar żgħażagħ jidħlu fl-għaqdiet u jipparteċipaw b’mod aktar attiv fil-komunità.”
Miriam Theuma – Kap Eżekuttiv ta’ Aġenzija Żgħażagħ
