Il-Gvern nieda white paper għall-konsultazzjoni pubblika li se twassal biex tinħoloq Awtorità ġdida dwar il-Bini u l-Kostruzzjoni. Waqt business breakfast it-Tlieta filgħodu, il-kordinatur tal-proġett Carlo Mifsud qal li l-awtorità se jkollha l-qafas regolatorju biex tgħolli l-istandards.
Qal li l-white paper qed tipproponi li erba’ entitajiet preżenti jingħaqdu taħt awtorità waħda.“L-iskop ta’ din il-white paper hu li niftħu konsultazzjoni ma’ nies fl-industrija u mal-poplu inġenerali sabiex fi żmien qasir jkollna Awtorità li tieħu over minn dawk li llum huma erba’ entitajiet li huma l-BICC, il-BRO, il-BRB u l-Masonry Board u għalhekk intqajna llum sabiex nillaunchjaw din il-white paper ħalli nirċievu lura l-feedback mingħand in-nies”.
Is-Sur Mifsud qal li bħalissa hemm bosta liġijiet u regolamenti dwar is-settur li qed iwasslu għal inkonvenjent għall-pubbliku. Qal li permezz ta’ din l-Awtorità, din se ssir ħaġa tal-passat hekk kif il-liġijiet se jiġu reveduti u jitpoġġew f’keffa waħda.
“Għalhekk qedgħin naħsbu li ssir reviżjoni ta’ dawn il-liġijiet biex b’hekk ikunu f’post wieħed u min għandu bżonn xi ħadd li huwa esperjenzat imma anka dawk li m’humiex jafu fejn ifittxu u jkun dak li ngħidulu l-focal point”.
Huwa żied jgħid li l-awtorità se tieħu f’idejha wkoll l-impenn tal-infurzar.
“L-infurzar huwa wieħed mill-għanijiet ta’ din l-awtorità. illum għandek diversi entitajiet li jagħmlu dan l-enforcement iżda iva qed naraw li nibnu r-riżorsi mhux biss billi ngħidu li għadna r-regoli imma ninfurzawhom u nittrainjaw lin-nies li jinfurzaw dawk ir-regoli”.
Il-Ministru Ian Borg qal li dan it-tibdil qed isir f’kuntest ta’ suq li sar tant kruċjali għall-ekonomija Maltija. Dan hekk kif dan is-settur jimpjega madwar 30,000 ruħ.
“Aħna rridu nagħtu port of call fejn diversi entitajiet jingħaqdu taħt awtorita waħda li tkun tista tissalvagwardja l-komunità, liċ-ċittadini, fl-istess waqt tirregola il-qasam tal-kostruzzjoni li tant huwa bżonnjuż fl-ekonomija tagħna”.
Fl-intervent tiegħu, s-Segretarju Parlamentari Chris Agius sostna li din il-white paper se twassal għall-aqwa liġi possibbli sabiex dan is-settur, li jammonta għal madwar ħdax fil-mija tal-ekonomija Maltija, ikompli jikber.
Il-konsultazzjoni pubblika se tibqa’ miftuħa sal-15 ta’ Ottubru, u l-pubbliku jista’ jibgħat il-kummenti tiegħu billi jibgħat email fuq cba.mtip@gov.mt jew fuq is-sit elettronikuhttps://mtip.gov.mt/en/Pages/Public%20Consultations/Public-Consultations.aspx.
